BJP MLA:  भाजपची कार्यशाळा आज मुंबईत पार पडली. यावेळी भाजपचे तीन आमदार लिफ्टमध्ये अडकल्याची घटना घडली. प्रवीण दरेकर, मंदा म्हात्रे, श्वेता महाले हे लिफ्टमध्ये अडकले होते. यावेळी भाजपचे संकटमोचक पुन्हा मदतीला धावले.

ग्रामविकास मंत्री गिरीश महाजनांच्या मदतीने तिन्ही आमदारांची सुटका करण्यात आली. लिफ्टचा दरवाजा वाकवत महाजन यांनी आमदारांना बाहेर काढले. लिफ्टमध्ये अस्वस्थ आमदार म्हात्रे यांना दरेकरांनी आधार दिला. 

भिवंडीत एका रिसॉर्टमध्ये कार्यशाळा होती. यावेळी ही घटना घडली. आगामी निवडणुकांच्या पार्श्वभूमीवर भाजपने कंबर कसली आहे. आज राज्यभरातील महत्त्वाच्या नेत्यांची कार्यशाळा पार पडली. प्रदेशाध्यक्ष चंद्रशेखर बावनकुळे यांनी ही कार्यशाळा गोपनीय व्हावी म्हणून खबरदारी घेतली.

तसेच भाजपच्या महाविजय कार्यशाळेत "मोठं कुटुंब, सुखी कुटुंब"चा नारा देण्यात आला. भाजप मुंबई अध्यक्ष आशिष शेलार यांनी हा नारा दिला.

राष्ट्रवादी काँग्रेस व शिवसेनेसोबत जुळवून घेण्याचे आवाहन नेत्यांना करण्यात आले. शेलार यांनी प्रशिक्षण वर्गात ही  मांडणी केली.