Ulhasnagar Accident News : उल्हासनगर येथे भीषण अपघात झाल्याची घटना समोर आली आहे. येथे एका मध्यधुंद कारचालकाने दोन रिक्षा आणि ४ कारला जोरदार धडक दिली. या घटनेत तीन जणांचा जागीच मृत्यू झाला आहे तर तीन जण गंभीर जखमी झाले आहेत. सोमवारी पहाटे साडेपाच वाजता कल्याण बदलापूर मार्गावरील शांतीनगर परिसरात ही घटना घडली.

मृतांमध्ये दोन पुरुष आणि एका महिलेचा समावेश असून अपघाताची माहिती मिळताच पोलिसांनी तातडीने घटनास्थळी धाव घेतली. जखमींना उपचारासाठी उल्हासनगरच्या मध्यवर्ती रुग्णालयात दाखल करण्यात आलं आहे. मद्यधुंद अवस्थेत असलेल्या कार चालकाचे नियंत्रण सुटल्याने कार तीन रिक्षा आणि ४ कारना धडकली. या भीषण अपघातात तीन जणांचा जागीच मृत्यू झाला.

साम टीव्हीने दिलेल्या वृत्तानुसार, प्रमोद दौंड, महेंद्र पांढरे, जावेद जाफर अशी जखमी झालेल्या व्यक्तींची नावे आहेत. पोलिसांकडून मृतांची ओळख पटवणे सुरू आहे.