ठाणे : दिवा शहरात सोमवारी पुन्हा एकदा अनधिकृत बांधकामांवरील कारवाईने हलकल्लोळ माजला. मुंबई उच्च न्यायालयाच्या आदेशावरून ठाणे महापालिकेने 450 हून अधिक पोलिसांचा फौजफाटा घेऊन 350 हून अधिक घरांच्या चाळी भुईसपाट केल्या. रहिवाशांनी कारवाईला तीव्र विरोध केला. ते थेट कारवाईसाठी आलेल्या जेसीबीवर चढून बसले. मात्र पालिकेच्या अतिक्रमणविरोधी विभागाने पोलिसी बळाचा वापर करून रहिवाशांचा विरोध झुगारून लावला. 

कारवाई थांबवण्यासाठी काही रहिवासी जेसीबीवर चढले होते. त्यामुळे पोलिसांनी लाठीमार करून परिस्थिती नियंत्रणात आणली व कारवाई पूर्ण करण्यात आली. 

ही बातमी वाचली का? मुंबई उपनगराचे झाले गॅस चेंबर

उच्च न्यायालयाने दिलेल्या आदेशावरून दिवा साबेगाव परिसरातील कांदळवनावरील बेकायदा चाळी पाडण्याची कारवाई पालिका प्रशासनाने हाती घेतली. वास्तविक ही कारवाई गेल्या महिन्यातच पूर्ण केली जाणार होती. मात्र त्यावेळी जिल्हाधिकारी कार्यालयाने कारवाईला तात्पुरती स्थगिती दिली होती. ती कारवाई सोमवारी सकाळीच पुन्हा सुरू करण्यात आल्याने स्थानिक रहिवासी हादरून गेले. आपले घर वाचावे यासाठी रहिवाशांनी रस्त्यावर उतरून कारवाईला तीव्र विरोध केला. मात्र रहिवाशांच्या संभाव्य आंदोलनाची शक्यता गृहीत धरून प्रशासनाने मोठा पोलिस बंदोबस्त तैनात केला होता. त्यामुळे रहिवाशांना पोलिसांच्या मदतीने बाहेर काढून 350 हून अधिक घरे भुईसपाट करण्यात आली. 

ही बातमी वाचली का? ...अलिबागमध्ये आता बिनधास्त फिरा

अनेक लहान मुले, वृद्ध आणि महिलांनी कारवाईदरम्यान प्रचंड आक्रोश केला. त्यांना ऐन थंडीच्या दिवसांत बेघर व्हावे लागले. मात्र उच्च न्यायालयाचा आदेश असल्याने पालिका आणि पोलिसांनी कोणतीही दयामाया न दाखवता कारवाई दुपारच्या सुमारास यशस्वी केली. कारवाईदरम्यान 100 हून अधिक महिला पोलिस तैनात करण्यात आले होते.

आम्हाला शिक्षा का?
पालिका अधिकारी आणि भूमाफियांच्या संगनमतानेच दिव्यातील संबंधित चाळी उभारल्या गेल्या. त्याची शिक्षा आम्हाला का? प्रशासन आमच्या नुकसानीची भरपाई देणार का? असे अनेक सवाल नागरिकांनी उपस्थित केले.