महाड : कंपनीची सुमारे ८८ लाख रुपयांची रक्कम कंपनीच्या संचालकांच्या संमतीशिवाय बनावट बँक खाते (fake bank account) उघडून स्वतःच्या बँक खात्यात वळती करण्याची घटना (Money fraud) नुकतीच महाडमध्ये घडली. या प्रकरणी तीन भामट्यांसह बँक व्यवस्थापकाविरोधात महाड शहर पोलिस ठाण्यात (Mahad police station) गुन्हा दाखल करण्यात आला. ए. के. आर इंडस्ट्रीज प्रायव्हेट लिमिटेड या कंपनीच्या मालकांनी महाड शहर ठाण्यात तक्रार दाखल केली आहे.

मंगेश शितोळे (रा. तळेगाव, दाभाडे पुणे), प्रथमेश शिगवण (डोंबिवली) आणि नीलेश भारती आणि मानसी शितोळे (तळेगाव दाभाडे) यांच्याविरोधात अपहार व फसवणुकीचा गुन्हा दाखल करण्यात आला. मंगेश शितोळे हे या कंपनीमध्ये मुख्य व्यवस्थापक पदावर काम करीत होते. या पदाचा गैरफायदा घेऊन त्यांनी महाड शहरातील आयडीबीआय बँकेचे व्यवस्थापक प्रथमेश शिगवण यांना नीलेश भारती यांच्या मदतीने बँक खाते उघडण्यासाठी पैसे देऊन कंपनीच्या संचालकांच्या संमतीशिवाय एकेआर कंपनीचे बँक खाते आयडीबीआय बँकेत उघडले.

तसेच कंपनीच्या संचालकांची बनावट कागदपत्रे, स्टेट बँक ऑफ इंडिया व कॅनरा बँकेची बनावट ना हरकत दाखले तयार करून या कागदपत्रांच्या आधारे बेकायदेशीरपणे बनावट खाते आयडीबीआय बँकेत उघडले. कंपनीच्या व्यवसायातून मिळालेली ८७ लाख ७९ हजार ५३ रुपयांची रक्कम कंपनी संचालकांच्या परवानगीशिवाय परस्पर या बनावट बँक खात्यामध्ये जमा केली. यानंतर ही रक्कम रोखीने व वैयक्तिक बँक खात्यामध्ये मंगेश, नीलेश व मानसी या तिघांनी परस्पर वळवून काढून घेतली. ७ मार्च २०२० ते ३० एप्रिल २०२१ या कालावधीमध्ये हा प्रकार घडला होता.

कंपनीचे मोठ्या प्रमाणात फसवणूक झाल्याचे लक्षात येताच कंपनी मालकांनी याप्रकरणी आर्थिक गुन्हे शाखेकडे तक्रार नोंदवलेली होती. यानंतर वरिष्ठ कार्यालयाच्या अर्जानुसार आज रविवारी ६ मार्चला महाड शहर पोलिस ठाण्यामध्ये या चौघा जणांविरोधात गुन्हा दाखल करण्यात आला.