अलिबाग : रायगड पोलिस दलाने (Raigad Police) राज्यात उत्कृष्ट पोलिस घटक हा बहुमान यंदा पटकाविला. गुन्ह्याचा योग्य दिशेने तपास आणि कायदा सुव्यवस्था (law and order) अबाधित राखण्यात हे दल अव्वल ठरल्याने हा बहुमान मिळाला. राज्याचे गृहमंत्री दिलीप वळसे पाटील (Dilip walse Patil) यांच्या अध्यक्षतेखाली आठ एप्रिलला मुंबईतील पोलिस महासंचालक कार्यालयात झालेल्या राज्यस्तरीय सभेत घेण्यात आलेल्या आढाव्यामध्ये २०२० मध्ये रायगड जिल्ह्यास सर्वोकृष्ट घटक म्हणून पारितोषिक प्रदान करण्यात आले.

रायगड जिल्हा अधीक्षक अशोक दुधे यांना गृहमंत्री दिलीप वळसे पाटील यांच्या हस्ते पारितोषिक व प्रमाणपत्र प्रदान करून गौरविण्यात आले. या वेळी राज्याचे महासंचालक रजनीश सेठ, मुंबईचे आयुक्त संजय पांडे, अपर पोलिस महासंचालक राजेंद्र सिंह, कोकण परिक्षेत्राचे उपमहानिरीक्षक संजय मोहिते उपस्थित होते.