पडघा : भिवंडी (Bhiwandi) तालुक्यातील पडघा येथे एका दुचाकीमधून एक लाख ४४ हजारांची एमडी पावडर जप्त (MD powder seized) करण्यात आली. याप्रकरणी एका कथित पत्रकाराला अटक (culprit arrested) केली आहे. मुंबई-नाशिक महामार्गावर पडघा टोलनाका परिसरात वाहतूक सुरळीत करण्यासाठी सहायक पोलिस निरीक्षक अमोल साळुंखे यांच्या मार्गदर्शनाखाली तपासणी सुरू होती. गुरुवारी (ता. २०) मध्यरात्री मोटरसायकलसह एक व्यक्ती बराच वेळ उभा होता. त्याची चौकशी केली असता पत्रकार असल्याची अनेक ओळखपत्रे आढळली.

पोलिसांना संशय आल्याने त्याच्या मोटरसायकलची झडती घेतली असता १४.६०० ग्रॅम एमडी (मेफ्रेडॉन) पावडर सापडली. मुस्तकीन नसीम खान (वय ३३, रा. गैबीनगर, भिवंडी) असे अटक करण्यात आलेल्या ड्रग्ज तस्कराचे नाव आहे. त्याच्याविरोधात गुन्हा दाखल करत अटक करण्यात आले. न्यायालयाने त्याला २४ जानेवारीपर्यंत पोलिस कोठडी सुनावली.