घाटकोपर : सायन पोलिस ठाण्याच्या (sion police station) हद्दीतील पालिका हॉस्पिटल परिसरात वाहतूक पोलिसांच्या (Fake traffic police) गणवेशात संशयितरीत्या फिरणाऱ्या एका तोतया वाहतूक पोलिसाला माटुंगा वाहतूक पोलिसांनी ताब्यात घेऊन त्याला सायन पोलिसांच्या ताब्यात दिले. सूर्यकांत यशवंत माने (Suryakant mane arrested) असे त्याचे नाव असून त्याच्यावर फसवणुकीचा गुन्हा दाखल करण्यात आला आहे. या घटनेत माटुंगा वाहतूक शाखेतील पोलिस नाईक संदीप शेलार हे फिर्यादी आहेत. यातील अटक आरोपी सूर्यकांत माने हा सध्या बीपीसीएल कंपनीसमोर (bpcl company) माहुल गाव चेंबूर येथील इमारत क्रमांक १९ मध्ये राहण्यास आहे.

आरोपी हा बुधवारी सायंकाळी ४.३० वाजण्याच्या सुमारास सायन येथील डॉ. बाबासाहेब आंबेडकर रोडवरील सायन हॉस्पिटल जंक्शन या ठिकाणी मुंबई वाहतूक पोलिसांच्या गणवेशात संशयितरीत्या फिरत असताना संदीप शेलार यांना आढळला. त्यामुळे त्यांनी पोलिस शिपाई सचिन राजाराम घागरे यांच्यासह गस्त घालतानाच हटकले. त्याने अंमलदाराचा गणवेश परिधान केल्याबद्दल विचारपूस केली. त्या वेळी त्याच्याकडे त्याचे ओळखपत्र, कार्यरत विभाग आणि इतर चौकशी केली. मात्र त्याने दिलेली सर्व माहिती खोटी असल्याचे निष्पन्न झाले. त्यानंतर त्याला सायन पोलिस ठाणे येथे नेण्यात आले. पोलिसांच्या चौकशीअंती गुन्हा नोंद करण्यात आला आहे. याबाबत उपनिरीक्षक किरण भोसले तपास करत आहेत.

साहित्य हस्तगत : आरोपीकडून एक मोटरसायकल, आधार कार्ड, पॅन कार्ड, वाहनचालक परवाना, महाराष्ट्र सुरक्षा बल अधिकारी यांचे ओळखपत्र, वाहतूक पोलिस अंमलदाराचा पूर्ण गणवेश, बेल्ट, नंबर प्लेट आदी साहित्य हस्तगत करण्यात आले आहे, अशी माहिती माटुंगा वाहतूक विभागाचे प्रभारी पोलिस निरीक्षक हरिदास किल्लेदार यांनी दिली.