मुंबई : घरातून पळून आलेल्या, वेगवेगळ्या कारणांमुळे कुटुंबापासून विभक्त झालेल्या वा हरवलेल्या मुलांना (Missing children cases) त्यांच्या पालकांच्या स्वाधीन करण्याची मोहीम ‘आरपीएफ’द्वारे (RPF) हाती घेण्यात आली आहे. संपूर्ण देशभरात ‘ऑपरेशन नन्हे फरिश्ते’ (Operation Nanhe Farishte)अंतर्गत मुलांची घरवापसी केली जात आहे. जानेवारीत विविध स्थानकांवरून १०४५ मुलांना त्यांच्या घरी पाठवण्यात आले. त्याच वेळी ४२ प्रवाशांचे प्राण वाचवण्यात आरपीएफला यश आले आहे.

शहरांचे आकर्षण, कुटुंबियांशी वाद इत्यादी कारणांमुळे मुले-मुली घर सोडून पळून जातात. ही मुले रेल्वे स्थानकांवर येतात. स्थानकांत एकट्याने फिरणाऱ्या मुलांची चौकशी केली जाते. त्यानंतर स्वयंसेवी संस्थांच्या मदतीने त्यांची माहिती माहिती गोळा केली जाते. त्यानंतर त्यांना घरी पाठवण्यात येते. जानेवारीत एकूण ७०१ मुले आणि ३४४ मुलींना पालकांच्या स्वाधीन करण्यात आले; तर भारतीय रेल्वेच्या १३२ रेल्वे स्थानकांवर बाल मदत कक्ष उभारण्यात आला आहेत.

रूळ ओलांडणाऱ्यांवर कारवाई

‘मिशन जीवनरक्षा’अंतर्गत आत्महत्या करण्यासाठी रेल्वेगाड्यांखाली येणाऱ्यांचे प्राण वाचवण्यात ‘आरपीएफ’ला यश आले आहे. अनेकदा प्रवासी घाईत रेल्वे रूळ ओलांडतात; तर काही जण रेल्वे रुळांवर स्वतःला झोकून देतात. असा प्रयत्न करणाऱ्या २० पुरुष आणि २२ महिला मिळून ४२ जणांचे प्राण वाचवले आहेत.

तस्करीला आळा

रेल्वेच्या माध्यमातून वन्य प्राण्यांचा अवैध व्यापार करणाऱ्या तस्कारांविरुद्ध कठोर पावले उचलण्यात आली आहेत. जानेवारीत प्राण्यांच्या अवयवांची तस्करी करणाऱ्या दोघांना अटक करण्यात आली. दुर्मिळ कासव, विविध प्रजातींचे जंगली पक्षी, नामशेष होण्याच्या मार्गावर असलेली गिधाडे जप्त करून ती वनविभागाच्या ताब्यात देण्यात आली.