पनवेल : वेगाने धावणाऱ्या परदेशी महागड्या दुचाकीने (Sports bike) सध्या तरुणाईला भुरळ घातली आहे. हीच भुरळ शीव-पनवेल महामार्गावरील कळंबोली सर्कल येथे पाहायला मिळाली. लाखों रुपयांची दुचाकी महामार्गावरून जात असताना वाहतूक पोलिसांनी (Traffic Police) तपासणीसाठी अडवली. मात्र, दुचाकीच्या आकर्षणामुळे पोलिसांनी तपासणीनंतर चक्क फोटोसेशन (Photoshoot on sports bike) सुरू केले. या फोटोसेशनमुळे दुचाकीचालक तरुण मात्र काही वेळ बुचकळ्यात पडला होता.

परदेशातून आयात करण्यात येणाऱ्या महागड्या गाड्यांचे वेड आपल्या देशात पूर्वीपासूनच आहे. धूम चित्रपटात दुचाकीवर दाखवण्यात आलेल्या स्टंटमुळे या वेडात आणखी भर पडली आहे. पेण तालुक्यातील गडब गावात राहणारा जयेश पाटील हा युवक मंगळवारी (ता. २२) शीव-पनवेल महामार्गावरून घरी निघाला होता. या वेळी कळंबोली सर्कल येथे वाहतूक विभागातील पोलिस कर्मचाऱ्यांकडून वाहतूक नियमन व वाहनांची तपासणी करण्याचे काम सुरू होते. त्याच वेळी दुचाकीवरून जाणाऱ्या जयेशला त्यांनी अडवले. कर्मचाऱ्यांनी त्याला दुचाकीच्या कागदपत्रांची चौकशी केली. त्यानंतर दुचाकी किती लाखांची आहे, अशी चौकशी केली.

त्यावर दुचाकीचालकाने ३० लाखांची दुचाकी असल्याचे सांगताच पोलिस अचंबित झाले.
त्या दुचाकीच्या आकर्षणामुळे वाहतूक विभागातील कर्मचाऱ्यांनी दुचाकीसोबत फोटो काढू देण्याची विनंती केली. दुचाकीचालकाने होकार देताच दुसऱ्याच मिनिटात वाहतूक विभागाच्या कर्मचाऱ्यांनी फोटो काढायला सुरुवात केली. गडब गावातील जयेश हा सध्या महाविद्यालयीन शिक्षण घेत असून, त्याला महागड्या दुचाकीचे आकर्षण असल्याचे त्याने सांगितले.