मोखाडा : मोखाडा नगरपंचायतीवर (Mokhada Nagar panchayat election) शिवसेनेने पुन्हा आपले वर्चस्व कायम ठेवले आहे. आघाडीच्या उमेदवाराने उमेदवारी अर्ज माघारी घेतल्याने शिवसेनेचे अमोल पाटील (Amol patil) नगराध्यक्षपदी; तर उपनगराध्यक्षपदी नवसू दिघा (Navasu digha) बिनविरोध निवडून आले आहेत. त्यामुळे मोखाडा नगरपंचायतीवर पुन्हा शिवसेनेचा भगवा फडकला आहे. सदरची निवडणूक नगरविकास मंत्री, शिवसेना नेते एकनाथ शिंदे (Eknath shinde) व पालघर जिल्हा संपर्क प्रमुख आमदार रवींद्र फाटक (Ravindra phatak) यांच्या मार्गदर्शनाखाली लढविण्यात आली आहे. या निवडणुकीनंतर शिवसैनिकांनी फटाके फोडून आणि विजयाच्या घोषणा देत आनंदोत्सव साजरा केला आहे.

नगरपंचायतीची निवडणूक झाल्यानंतर महिन्यांनंतर नगराध्यक्ष आणि उपनगराध्यक्षपदाची निवडणूक झाली आहे. नगराध्यक्षपदाच्या निवडणुकीसाठी शिवसेना आणि जिजाऊ सामाजिक संघटनेची युती केली होती. नगराध्यक्षपदाच्या निवडणुकीसाठी शिवसेनेकडून अमोल पाटील यांचा उमेदवारी अर्ज दाखल केला होता; तर काँग्रेस, राष्ट्रवादी, बहुजन विकास आघाडी आणि माकप आघाडीकडून प्रमोद कोठेकर यांनी उमेदवारी अर्ज दाखल केला होता. मात्र मंगळवारी (ता.२२) प्रमोद कोठेकर यांनी उमेदवारी अर्ज माघारी घेतला. त्यामुळे आज अधिकृतरीत्या शिवसेनेचे अमोल पाटील यांची नगराध्यक्षपदी बिनविरोध निवड झाली आहे; तर उपनगराध्यक्षपदी नवसू दिघा हे देखील बिनविरोध निवडून आले आहेत. नवनिर्वाचित नगराध्यक्ष आणि उपनगराध्यक्षांचे सर्व स्तरांतून अभिनंदन करण्यात येत आहे.

मोखाडा नगरपंचायतीमधील पक्षीय बलाबल

एकूण सदस्य संख्या - १७.
शिवसेना - ८
राष्ट्रवादी - ४
जिजाऊ संघटना - २
भाजप - २
काँग्रेस - १