धारावी : दिवसेंदिवस वाढणाऱ्या उकाड्याचा तडाखा माणसांबरोबर पशू-पक्ष्यांनाही (Bird-Animals) जाणवू लागला आहे, म्हणून एप्रिल- मे महिन्यातील कडक उन्हाच्या दिवसांत (Summer hit) पशू-पक्ष्यांच्या बचावासाठी सर्व नागरिकांनी प्रयत्न करावेत, असे आवाहन ‘स्पॅरोज शेल्टर’ संस्थेतर्फे (Sparrow shelter organization) करण्यात आले आहे. संस्थेच्या स्वयंसेवकांनी महिनाभरात जवळपास १५० ते २०० उष्माघाताने आजारी पक्ष्यांवर उपचार केल्याची माहिती संस्थेच्या प्रवक्त्याने दिली आहे. ''स्पॅरोज शेल्टर’ ही संस्था गेली १३ वर्षे पक्ष्यांचे संरक्षण व संवर्धनासाठी प्रयत्नरत आहे.

उन्हाळ्याच्या दिवसांत पाण्याअभावी व उन्हाच्या तडाख्याने पक्ष्यांचे जीव धोक्यात येत असल्याचे ओळखून संस्थेच्या स्वयंसेवकांनी ठिकठिकाणी घरगुती व सार्वजनिक ठिकाणी पाणपोई सुरू केली आहे. तशाच पद्धतीने सर्व नागरिकांनी आपल्या घरासमोर छोट्या वाटीद्वारे पक्ष्यांसाठी ताजे पाणी उपलब्ध करून द्यावे, असे आवाहन संस्थेचे अध्यक्ष प्रमोद माने यांनी केले आहे.

घार हा पक्षी आकाशात खूप उंचावर उडतो. त्यामुळे त्या पक्ष्याला उन्हाचे जोरदार तडाखे बसल्यामुळे उष्माघाताने असे पक्षी जमिनीवर चक्कर येऊन पडतात. त्यामुळे त्यांना त्यांचा जीव गमवावा लागतो. जास्त उष्मा असेल तर निर्जलीकरणामुळे हे पक्षी घायाळ होतात. मृत्युमुखी पडतात. त्यावर उपाय म्हणून नागरिकांनी इमारतीच्या गच्चीवर मुबलक पाण्याची सोय करावी, असे आवाहन ‘स्पॅरोज शेल्टर’चे अध्यक्ष प्रमोद माने यांनी केले आहे.