सुधागड तालुक्यात महिलाराज
पाली, ता. २४ (वार्ताहर) ः सुधागड तालुक्यातील ३३ ग्रामपंचायतींचे सरपंचपदाचे आरक्षण सोडत बल्लाळेश्वर देवस्थान भक्तनिवास येथे जाहीर करण्यात आले. या वेळी ३३ पैकी १७ जागांवर महिला आरक्षण पडले आहे. अनुसूचित जातीसाठी महिला एक जागा, अनुसूचित जमातीसाठी आरक्षित जागा पाच व महिलांसाठी सहा, नामाप्र आरक्षित जागा २७ टक्‍केप्रमाणे खुला चार व महिला पाच, सर्वसाधारण जागा खुला सात व महिला पाच असे जाहीर करण्यात आले.
..................
खालापुरात ४५ पैकी २२ ग्रामपंचायतींमध्ये महिलांना संधी
खालापूर, ता. २४ (बातमीदार) ः पुढील पाच वर्षांसाठी खालापूर तालुक्यातील ४५ ग्रामपंचायतींच्या सरपंचपदासाठी आरक्षण सोडत नुकतीच जाहीर करण्यात आली. सरपंचपदाच्या आरक्षण सोडतीसाठी प्रांताधिकारी प्रकाश सकपाळ, खालापूरचे तहसीलदार अभय चव्हाण, नायब तहसीलदार सुधाकर राठोड, पंचायत समिती वरिष्ठ गटविकास अधिकारी संदीप कराड उपस्थित होते. ४५ पैकी दोन ग्रामपंचायती अनुसूचित जाती, दहा ग्रामपंचायती अनुसूचित जमाती, बारा ग्रामपंचायती नागरिकांचा मागास प्रवर्ग तर उर्वरित २१ ग्रामपंचायती सर्वसाधारण सरपंचपदासाठी आरक्षित झाल्या आहेत. यापैकी २२ ग्रामपंचायतीत महिला सरपंच बसणार आहेत. आरक्षण सोडतीच्या सुरुवातीलाच जनगणना मुद्दा उपस्थित करण्यात आला होता; परंतु प्रांताधिकारी सकपाळ यांनी निवडणूक आयोग आणि जिल्हाधिकारी यांच्या आदेशानुसार नियमाच्या चौकटीतच आरक्षण सोडत काढण्यात येणार असून हरकत असल्यास लेखी देण्याची सूचना केली. सरपंचपदासाठी आरक्षित महिला जागांसाठी काही ठिकाणी चिठ्ठीवर निर्णय घेण्यात आला. मोठ्या प्रमाणात इच्छुक पुरुष उमेदवारांची महिला आरक्षण पडल्यामुळे मोठी निराशा झाल्याचे पाहावयास मिळाले.