सकाळ वृत्तसेवा
अलिबाग, ता. २३ : ग्रामीण आरोग्यसेवेच्या सक्षमीकरणासाठी राष्ट्रीय केमिकल अ‍ॅण्ड फर्टिलायझर्सच्या थळ युनिट व क्षितिज मल्टीपर्पज असोसिएशन यांच्या संयुक्त विद्यमाने नुकतेच अलिबाग तालुक्यातील २२० आशा कार्यकर्त्यांना वैद्यकीय किटचे वितरण करण्यात आले. किटमध्ये ग्लुकोमीटर, बीपी मॉनिटर, प्रेग्नेंसी टेस्ट किट, मेंस्ट्रुअल कप व ज्यूट बॅग यांचा समावेश आहे. ग्रामीण भागातील महिलांना घरपोच प्राथमिक तपासणी सेवा उपलब्ध व्हावी आणि वेळेत उपचार मिळावेत, हा या उपक्रमामागचा प्रमुख उद्देश होता.
वैद्यकीय किट केवळ एक साधन नसून, आशा कार्यकर्त्यांना अधिक सक्षम करून ग्रामीण आरोग्य व्यवस्था अधिक सशक्त करण्याचा प्रयत्न असल्‍याचे विचार आरसीएफचे कार्यकारी संचालक नितीन हिरडे यांनी या वेळी व्यक्‍त केले. कार्यक्रमात आरसीएफचे वरिष्ठ अधिकारी प्रशासन व मानव संसाधन महाव्यवस्थापक संजय हरळीकर, निगमित संचार महाव्यवस्थापक मधुकर पाचारणे, उपमहाव्यवस्थापक प्रशांत पाटील, सल्लागार धनंजय खामकर, वरिष्ठ व्यवस्थापक हर्षला शिंदे, वरिष्ठ अधिकारी डॉ. राकेश कवळे व निगमित संचार अधिकारी योगेंद्र भोईर यांनी उपस्थित राहून उपक्रमात सहभाग नोंदवला. जिल्हा आरोग्य अधिकारी डॉ. ज्ञानेश्वर व तालुका आरोग्य अधिकारी डॉ. अश्विनी सकपाळ यांनी आशासेविकांना मार्गदर्शन केले. कार्यक्रमात आय केअर फाउंडेशनच्या डॉक्टरांनी आशासेविकांना बीपी व शुगर तपासणी सेवा प्रदान केली आणि आवश्यकतेनुसार औषधांचे वाटपही करण्यात आले. क्षितिज मल्टीपर्पज असोसिएशन संस्थेच्या स्थापिका व अध्यक्षा शीतल माळी, संस्थापक सचिव दिनेश माळी, व्यवस्थापकीय संचालक निकीत पाटील, सदस्य राखी टाकले, अंकिता माडगुळकर आणि अक्षता मेंगाळ यांनी कार्यक्रमात सक्रिय सहभाग घेतला. उपक्रमाबद्दल अनेक आशासेविकांनी मनोगत व्यक्त केले.

आरोग्‍य व्यवस्‍था सक्षम
पूर्वी महिलांना तपासणीसाठी सरकारी दवाखान्यात पाठवावे लागत होते. आता या किटमुळे घरोघरी तपासणी करू शकतो, असे म्हणत त्यांनी आरसीएफ कंपनीचे आभार मानले. हा उपक्रम केवळ वैद्यकीय किट वितरणापुरता मर्यादित न राहता, ग्रामीण आरोग्य व्यवस्थेत अधिक सक्षम करण्याच्या दिशेने महत्त्वाचे पाऊल ठरले आहे.