पाली, ता. २९ (वार्ताहर) ः सुधागड तालुक्यातील पडसरे गावाला जोडणाऱ्या पुलाची दुरवस्था होऊन पूल वाहतुकीसाठी धोकादायक झाला होता. याबाबत ‘सकाळ’मध्ये वृत्त प्रसिद्ध होताच प्रशासनाला जाग आली असून, पुलाच्या दुरुस्ती कामाला सुरुवात झाली आहे.
पडसरे पुलाचे प्लास्टर निखळले होते. तसेच सळ्या बाहेर निघून लोंबकळत होत्या. पुलाचे संरक्षक कठडेही तुटले आहेत. पुलाच्या दुरुस्तीसंदर्भात पाली-सुधागडचे तहसीलदार उत्तम कुंभार यांनी रायगड जिल्हा परिषद बांधकाम विभागाकडे पत्रव्यवहार केला होता. त्या अनुषंगाने कार्यकारी अभियंता राहुल देवांग यांचा आदेशाने पेणचे उपअभियंता प्रकाश गावित यांचा मार्गदर्शनाखाली पडसरे पुलाच्या दुरुस्तीचे काम सुरू झाले आहे. चार दिवसांमध्ये दुरुस्तीचे काम पूर्ण करून रहदारीसाठी खुला केला जाईल, असे कंत्राटदाराकडून सांगण्यात येत आहे. सद्यस्थितीत पुलाच्या खालच्या बाजूस प्लास्टर करण्यात आले असून, लोंबकळणाऱ्या सळ्याही सुस्‍थितीत करण्यात येत आहेत. पुलाला आधार देण्यासाठी खांबही उभारण्यात आले आहेत. नवीन पुलाला मंजुरी मिळताच काम सुरू करण्यात येईल, असे सार्वजनिक बांधकाम विभागाकडून सांगण्यात येत आहे.

पाली ः पडसरे पुलाची दुरुस्ती सुरू करण्यात आली आहे.