मराठी संस्कृतीवरील हल्ला परतवून लावू
काँग्रेस प्रदेशाध्यक्ष हर्षवर्धन सपकाळ यांचे प्रतिपादन; युवा कार्यकर्त्यांना मार्गदर्शन
सकाळ वृत्तसेवा
अलिबाग, ता. २९ : ‘मराठी ही फक्त एक भाषा नाही, तर ती एक संस्कृती आहे. हा शिवरायांचा महाराष्ट्र आहे. त्यामुळे मराठी संस्कृतीवर कोणी हल्ला करीत असेल, तर तो आम्ही परतवून लावू, हिंदी भाषा रेटण्याचा सरकार प्रयत्न करीत आहे. तो कदापि सहन करणार नाही,’ असे प्रतिपादन काँग्रेसचे प्रदेशाध्यक्ष हर्षवर्धन सपकाळ यांनी केले.
काँग्रेसचे प्रदेशाध्यक्ष हर्षवर्धन सपकाळ यांनी रविवारी ‘ओळख स्वतःची, विश्वाची व परिकल्पनेतील भारताची’ या विषयावर अलिबाग येथे कार्यकर्त्यांशी संवाद साधला. त्या वेळी ते म्हणाले, ‘मी पूर्णवेळ एक कार्यकर्ता आहे. माणूस आणि प्राणी यांत निश्चितच फरक आहे. तो आपण समजून घेतला पाहिजे. भारतीय संस्कृती महान आहे. त्यामुळे आपण स्वतःला अधिकाधिक विकसित केले पाहिजे,’ ‘काँग्रेसची विचारधारा आणि आजपर्यंतची वाटचाल’ याविषयी माजी आमदार रामहरी रूपनवर, ‘काँग्रेस पक्ष स्थापना, उपलब्धी, काँग्रेसची देशाला गरज'' माजी आमदार उल्हास पवार, ‘पक्षाची विचारधारा, कार्यकर्त्यांना पक्षात संधी'' महाराष्ट्र प्रदेश काँग्रेस समिती सदस्य आणि प्रवक्ते सचिन सावंत आदींनी आपले विचार मांडले. काँग्रेसचे प्रदेशाध्यक्ष हर्षवर्धन सपकाळ यांनी शनिवारी रात्री काँग्रेस कार्यकर्त्यांच्या सुमधुर गीतांचा आनंद घेतला. या वेळी उल्हास पवार, सचिन सावंत, यशराज पारखी यांचा सन्मान महेंद्र घरत यांच्या हस्ते सन्मान करण्यात आला. हे प्रशिक्षण शिबिर आंतरराष्ट्रीय कामगार नेते आणि काँग्रेसचे रायगड जिल्हाध्यक्ष महेंद्र घरत यांच्या नेतृत्वाखाली  यशस्वी  झाले.