पाली, ता. ३ (वार्ताहर) ः वारंवार खंडित होणारा वीजपुरवठा आणि मुख्यालयी राहणारा लाइनमन मिळावा याकरिता वाघोशी पंचक्रोशीतील ग्रामस्थांनी गुरुवारी (ता. ३) पालीतील महावितरण कार्यालयाला घेराव घातला. या वेळी नागरिकांनी समस्या मांडून अधिकाऱ्यांना जाबही विचारला.
पावसाळा सुरू झाल्‍यापासून वाघोशी पंचक्रोशीत वारंवार विद्युत पुरवठा खंडित होत आहे. काही दिवसांपूर्वी कुंभारघर येथे सतत तीन दिवस बत्ती गुल होती. तसेच रोज काही ना काही कारणाने वीजपुरवठा खंडित होत आहे.
वाघोशी पंचक्रोशीत कुठलाही लाइनमन राहत नाही. त्‍यामुळे वीज खंडित झाल्‍यास पालीमधून लाइनमन गेल्‍यानंतरच दुरुस्‍तीचे काम हाती घेतले जाते. तोपर्यंत नागरिकांना अंधारात बसावे लागते. याचा जाब विचारण्याकरिता नागरिकांनी महावितरण कार्यालयात अधिकारी बालाजी छात्रे व राहुल भंडारी यांना घेराव घातला. तसेच वाघोशीसाठी कायमस्‍वरूपी लाइनमन देण्याची मागणी केली. या वेळी वाघोशी पंचक्रोशीतील गणेश देशमुख, भरत गोळे, सुदेश देशमुख, चिंतामण पवार, अमित गायकवाड, सुरेंद्र खेडकर, दत्तात्रय हातकमकर, रोशन खंडागळे, गणेश लटके, प्रशांत आरेकर, परशुराम सगळे, चेतन तळकर आदी ग्रामस्थ उपस्थित होते.

महावितरणकडे सध्या मनुष्‍यबळाचा अभाव आहे, मात्र वरिष्‍ठ कार्यालयात प्रस्‍ताव पाठवण्यात आला असून, लवकरात लवकर नागरिकांची गैरसोय दूर केली जाईल, असे आश्‍वासन बालाजी छात्रे व राहुल भंडारी यांनी दिले. वाघोशीत वारंवार वीज जात असल्‍याने नागरिकाचे विशेषतः विद्यार्थ्‍यांचे शैक्षणिक नुकसान होत आहे. आठ दिवसांत लाइनमन मिळाला नाही, जनआंदोलन करू. लाइनमनने नियुक्‍तीच्या ठिकाणी राहणे बंधनकारक असल्‍याचे संतप्त ग्रामस्‍थांनी सांगितले.

पाली ः वाघोशीतील ग्रामस्थांनी वीज वितरण कार्यालयाला घेराव घातला.