मधुमेहमुक्ती सहज साध्य ः डॉ. भाग्येश कुलकर्णी
कमळ नागरी पतसंस्थेच्या वतीने कार्यक्रमाचे आयोजन; तणावविरहित जीवनशैली अंगीकारण्याचे आवाहन
अलिबाग, ता. १२ : व्यायामाची सवय, जेवणातील सातत्य आणि मानसिक तणावविरहित जीवनशैलीच्या अंगीकारणाने मधुमेहापासून हमखास मुक्तता मिळते, असे मार्गदर्शन पुणे येथील रिव्हर्सल स्पेशलिस्ट तथा डायबेटीस फ्री फॉरेएव्हरचे संचालक डॉ. भाग्येश कुलकर्णी यांनी केले. रविवारी (ता. १०) कमळ पतसंस्थेच्या सहकार्याने आयोजित ‘मधुमेहमुक्त जीवन कसे ते जाणून घेऊ’ या कार्यक्रमात ते बोलत होते.
संस्थेचे अध्यक्ष नंदकुमार चाळके यांच्या प्रयत्नाने व सहकार्याने या कार्यक्रमाचे आयोजन केले. त्याचबरोबर संचालक मंडळ उपस्थित होते. या वेळी डॉ. संजीव शेटकर, डॉ. अमेय केळकर, विलास म्हात्रे, डॉ. अरविंद केळकर, डॉ. अपूर्वा कुमठेकर व डॉ. अवनी केळकर यांचा सन्मानपत्र देऊन कमळ पतसंस्थेच्या वतीने सत्कार करण्यात आला. कायम निरोगी राहताना दीर्घकालीन आरोग्य आणि मधुमेहापासून मुक्तता कशी करायची याबाबत भाग्येश कुलकर्णी यांनी मार्गदर्शन केले.
भाग्येश कुलकर्णी म्हणाले की, कार्बोहायड्रेट आणि शरीरातील एनर्जी या दोन्ही गोष्टी मधुमेह वाढीसाठी कारणीभूत ठरत आहेत. यातील एक चरबी वाढणे आणि जीवनामध्ये तणाव. मधुमेह सुरुवातीला तपासणीसाठी ग्लुकोज टॉलरन्स ही टेस्ट ही महत्त्वाची असते व ती केल्यावर शुगर दीडशेच्या आत येणे हे गरजेचे असते. या वेळी मनोगतात अरविंद केळकर यांनी सांगितले की, एका कुटुंबात तीन पिढ्या नांदत असतात, प्रत्येक पिढीमध्ये जेवण, दळणवळण शारीरिक अंगमेहनतीची कामे व मानसिक ताणतणाव हे वेगाने बदलत आहे. सध्याच्या पिढीमध्ये बैठी जीवनशैली, बाहेरचे पदार्थ खाण्याची सवय व अतिरिक्त ताणतणाव यामुळे तरुण वयातसुद्धा अनेकांना मधुमेह आढळण्यास सुरुवात झाली आहे. पूर्वी मधुमेह रुग्ण ५० किंवा ६० नंतर आढळत होते, मात्र आता वयाच्या तिशीनंतरही आढळून येतात.