रायगडातील वृद्ध कलाकार व साहित्यिक वाढीव मानधनापासून वंचित
पाच महिन्यांपासून प्रतीक्षा; नाराजीचा सूर
सकाळ वृत्तसेवा
पाली, ता. १३ (वार्ताहर) ः वृद्ध कलाकार, साहित्यिक मानधन योजना वृद्धापकाळात महत्त्वाची ठरत होती, परंतु मागील पाच महिन्यांपासून एकही हप्ता मिळालेला नाही. यामुळे रायगड जिल्ह्यातील वृद्ध कलाकार व साहित्यिक यांच्यामध्ये नाराजीचा सूर आहे.
वृद्ध कलाकार साहित्यिक मानधन योजनेअंतर्गत पूर्वी प्रतिमाह अडीच हजार रुपये पेन्शन दिली जात होती. शासनाने नोव्हेंबर २०२४ मध्ये या मानधनात वाढ करून पाच हजार रुपये प्रतिमाह करण्याचा निर्णय घेतला. त्यानंतर पाच महिन्यांपूर्वी वाढीव मानधनाचा फक्त पहिलाच हप्ता मिळाला, मात्र मागील पाच महिने एकाही हप्त्याचा भरणा झालेला नाही. या विलंबामुळे रायगड जिल्ह्यातील वृद्ध कलाकार व साहित्यिक यांच्यामध्ये नाराजीचा सूर आहे.
आर्थिक पाठबळ म्हणून सुरू असलेली ही योजना वृद्ध कलाकारांच्या उपजीविकेसाठी महत्त्वाची ठरत होती, मात्र वाढीची घोषणा करूनसुद्धा प्रत्यक्ष अंमलबजावणीत झालेल्या अडथळ्यांमुळे अनेकांना आर्थिक संकटांचा सामना करावा लागत आहे. शासनाने तातडीने थकीत हप्त्याचा भरणा करून पुढील मानधन नियमित करावे अन्यथा आंदोलनाचा मार्ग स्वीकारावा लागेल, असे मानधनापासून वंचित असलेले वृद्ध कलाकार हरिभाऊ दंत यांनी म्हटले आहे.

फोटो ओळ - मानधनापासून वंचित असलेले वृद्ध कलाकार हरिभाऊ दंत