सर्पमित्रांकडून आठ फूट अजगराला जीवदान
पाली, ता. १३ (वार्ताहर) ः सुधागड तालुक्यातील भालगूल येथील अनिल देशमुख यांच्या घराजवळ सोमवारी (ता. ११) आठ फूट अजगर आढळून आला होता. या अजगराला येथील सर्पमित्र दत्तात्रय सावंत, संदीप जाधव, अमित निंबाळकर व तेजस वीरकर यांनी मोठ्या शिताफीने पकडले आणि वन विभागाच्या मार्गदर्शनाखाली सुरक्षितरीत्या जंगलात सोडले.
अनिल देशमुख यांच्या घराजवळ अजगर आढळल्याने सर्वांची मोठी भंबेरी उडाली होती. याची माहिती त्यांनी तातडीने सर्पमित्रांना दिली. सर्पमित्रांनी अजगराला सुखरूप पकडून सुरक्षित नैसर्गिक अधिवासात सोडले आहे. मानवी वस्तीमध्ये साप आल्यास कोणीही घाबरून न जाता आणि कोणतीही दुखापत न करता सर्पमित्रांशी संपर्क साधावा, असे आवाहन सर्पमित्रांनी उपस्थितांना केले.

फोटो ओळ,
पाली ः अजगराला पकडताना सर्पमित्र संदीप जाधव