गोंधळपाडा येथे रक्तदान शिबिर
अलिबाग : गोंधळपाडा येथील जय भवानी मित्रमंडळातर्फे नवरात्रोत्सवानिमित्त धार्मिक व सांस्कृतिक कार्यक्रमांसह सामाजिक उपक्रमांचे आयोजन केले जाते. यानुसार मंगळवारी (ता. २३) रक्तदान शिबिर घेण्यात आले. या रक्तदान शिबिराला तरुणांनी उत्स्फूर्त प्रतिसाद दिला. शिबिरात सुमारे पंचवीसहून अधिक तरुणांनी रक्तदान केले. रायगड जिल्हा सामान्य रुग्णालयाच्या रक्तपेढीचे जिल्हा रक्त संक्रमण अधिकारी डॉ. दीपक गोसावी, समाजसेवक अधीक्षक नवनाथ अळ्ळी, अधिपरिचारक रामकुमार निकस, वैभव कांबळे, गणेश भोये, चालक महेश घाडगे, मंगेश पिंगळा यांच्या पथकाने रक्त संकलन केले. रक्तदात्यांना या वेळी जिल्हा रक्तपेढीतर्फे प्रमाणपत्र देण्यात आले. मंडळाचे अध्यक्ष मनोज पडियार यांच्या मार्गदर्शनाखाली सदस्य सुमित चव्हाण, महेश पडियार व त्यांच्या सहकाऱ्यांनी हे रक्तदान शिबिर यशस्वी करण्यासाठी मेहनत घेतली.