महाड, ता. २७ (बातमीदार) : कोल्हापूर पोलिसांनी जिल्ह्यात सुरू असलेल्या घरफोडींच्या घटनांचा पर्दाफाश केला असून स्थानिक गुन्हे अन्वेषण शाखेने तीन अट्टल चोरट्यांना जेरबंद केले आहे. हे तिघे चोरटे सावत्र भाऊ असून त्यातील दोघे महाडजवळ साहिलनगरमधील रहिवासी आहेत. या प्रकरणात तब्बल ३३ चोरीचे गुन्हे उघडकीस आले असून सुमारे ६८ लाख रुपयांचा मुद्देमाल चोरट्यांकडून जप्त करण्यात आला आहे.
सलीम महंमद शेख (३७) व जावेद महंमद शेख (३०, दोघेही रा. साहिलनगर, महाड) तर तौफिक महंमद शेख (३०, रा. कोल्हापूर) अशी या तिघा चोरट्यांची नावे आहेत. पोलिस उपनिरीक्षक शेषराव मोरे यांच्या पथकाने २१ एप्रिलला शाहूवाडी तालुक्यातील आंबाघाट येथे सापळा रचून यांना पकडले. पोलिस तपासात हे तिघेही सावत्र भाऊ असून, त्यांनी कोल्हापूर जिल्ह्यासह सांगली, सातारा, कोकण परिसरात अनेक घरफोड्या केल्या आहेत. यातील सलीम शेखवर खेड, दापोली, रोहा, माणगाव, पोलादपूर इत्यादी पोलिस ठाण्यात १२ घरफोडी व चोरीचे गुन्हे दाखल आहेत, तर तौफिक शेख हा दुचाकी चोरी प्रकरणातील आरोपी आहे. पोलिसांनी चोरट्यांकडून ६१ तोळे आठ ग्रॅम सोन्याचे दागिने, चार किलो ७८७ ग्रॅम चांदीचे दागिने, घरफोडीत वापरलेली वाहने व हत्यारे असा एकूण ६७ लाख ४८ हजार १५० रुपये किमतीचा मुद्देमाल जप्त केला आहे. करवीर १८, जुना राजवाडा पाच, शाहूपुरी दोन, लक्ष्मीपुरी दोन, राजारामपुरी दोन, गांधीनगर दोन, कागल एक, इचलकरंजी (मोटारसायकल चोरी) एक असे एकूण ३३ गुन्हे उघडकीस आले आहेत. तिघांकडून अजूनही कोल्हापूर, सांगली आणि सातारा जिल्ह्यातील काही गुन्हे उघडकीस येण्याची शक्यता पोलिसांनी वर्तवली आहे. महाडमध्ये झालेल्या घरफोड्यांमध्येही यांचा सहभाग असल्याचा संशयावरून पोलिस तपास करीत आहेत.