महाड, ता. २२ (बातमीदार) : डॉ. बाळासाहेब सावंत कोकण कृषी विद्यापीठ, दापोली संलग्न असलेल्या तालुक्यातील आचळोली येथील कृषी महाविद्यालयाच्या अंतिम वर्षाचे विद्यार्थी ग्रामीण कृषी जागरूकता कार्यानुभव कार्यक्रम २०२५-२६ अंतर्गत गोंडाळे गावात ग्रामीण शेतीला विज्ञानाची जोड देणे हा महत्त्वपूर्ण उद्देश घेऊन दाखल झाले. शैक्षणिक उपक्रमांतर्गत ऋत्विक शितोळे, निखिल धुमाळ, विनायक यमगर, प्रणव शितोळे, श्रेयस भागवत, अनुराज सोनवणे, ओंकार गोटे व रेवत गवई हे आठ कृषिदूत गावात वास्तव्यास असणार आहेत. गावातील शेतकऱ्यांसोबत थेट संवाद साधत माती परीक्षण, पीक संरक्षण, सेंद्रिय शेती, पाणी व्यवस्थापन, कीड व रोग नियंत्रण, आधुनिक यंत्रसामग्रीचा वापर, बाजारभाव, जनावरांची काळजी व संगोपन आणि शेतीचा प्रत्यक्ष अनुभव व शेतकऱ्यांच्या समस्या जाणून आधुनिक कृषी तंत्रज्ञानाची माहिती शेतकऱ्यांना देत आहेत. उपक्रमात विविध प्रकारच्या प्रगत कृषी तंत्रज्ञानाची थेट प्रात्यक्षिके शेतकऱ्यांसमोर मांडल जाणार आहेत. कृषिदूतांनी गोंडाळे गावाला व ग्रामपंचायतीला भेट दिली. या वेळी सरपंच आशीष खताते, उपसरपंच घनश्याम शेडगे, ग्रामसेवक किशोर मांडवकर, जिल्हा परिषद प्राथमिक शाळेचे मुख्याध्यापक व इतर शिक्षक यांच्यासह ग्रामस्थ व शेतकरी उपस्थित होते. या उपक्रमाअंतर्गत महाविद्यालयाचे प्राचार्य डॉ. वैभव गिम्हवणेकर, कार्यक्रम समन्वयक प्रा. विद्या पवार, कार्यक्रम अधिकारी प्रा. विठ्ठल घुले यांच्यासह इतर मार्गदर्शन करणार आहेत.

महाड ः कृषिदूतांकडून ग्रामस्‍थांना मार्गदर्शन करण्यात आले.