एसटीवर लाडक्या बहिणींची कृपा
रक्षाबंधनाच्या चार दिवसांत दोन कोटी १८ लाख रुपयांचे उत्पन्न
महाड, ता. १४ (बातमीदार) : रक्षाबंधनानिमित्ताने लाडक्या बहिणींसह अन्य प्रवाशांनी एसटी प्रवासाला विशेष पसंती दिल्याचे चित्र दिसत आहे. शुक्रवार (ता. ८)पासून ते सोमवार (ता. ११) पर्यंत या चार दिवसांमध्ये सहा लाखांहून अधिक प्रवाशांनी एसटी बसने प्रवास केला. या माध्यमातून एसटी महामंडळाला तब्बल दोन कोटी २८ लाख रुपयांचे उत्पन्न मिळाले आहे.
एसटी महामंडळाने महिलांना तिकीटदरामध्ये आता ५० टक्के सवलत दिल्याने एसटीने प्रवास करणाऱ्या महिलांची संख्या वाढली आहे. रायगड विभागांतर्गत समाविष्ट असलेल्या महाड, श्रीवर्धन, मुरूड, रोहा, अलिबाग, पेण, कर्जत व माणगाव या आगारांतर्गत १९ बसस्थानके आहेत. या स्थानकावरून आणि लहान-मोठ्या थांब्यांवरून जिल्ह्यामध्ये मोठ्या प्रमाणात एसटीची वाहतूक होत असते. यानुसार जिल्ह्यामध्ये ८ ऑगस्टपासून नारळी पौर्णिमा, रक्षाबंधन आणि रविवारी सुट्टीचा दिवस तर सोमवारी श्रावणी सोमवार या चार दिवसांमुळे एसटीला प्रवाशांचा भरभरून प्रतिसाद मिळाला आहे.
सहा लाखांहून अधिक प्रवाशांचा प्रवास
या काळात सहा लाखांहून अधिक प्रवाशांनी एसटीने प्रवास केला आणि चार दिवसांत एसटी महामंडळाला दोन कोटी १७ लाख ४८ हजार २२२ रुपयांचे उत्पन्न मिळाले आहे. यामध्ये महिलांचा वाटा मोठा असून, लाडक्या बहिणींनी या एसटी प्रवासात मोठा हातभार लावला आहे.
रक्षाबंधनाच्या दिवशी उत्पन्न अधिक
रक्षाबंधनाच्या एका दिवसामध्ये एसटीला तब्बल ५६ लाख ५१ हजार ८०८ रुपये इतके उत्पन्न मिळाले आहे. रक्षाबंधनाच्या निमित्ताने लाडक्या बहिणींबरोबर इतर यानुसार एक लाख ५० हजार ५४३ प्रवाशांनी एसटीतून प्रवास केला. त्यातून एका दिवसात एसटीला चांगले उत्पन्न मिळाले.
मागील वर्षीच्या तुलनेत वाढ
मागील वर्षी रक्षाबंधनाच्या दिवशी एसटी महामंडळाला ५० लाख ३८ हजार १२४ रुपयांचे उत्पन्न मिळाले होते. गतवर्षीच्या तुलनेत यामध्ये चांगली वाढ झाली असून, पाच लाख ८३ हजार ८८४ रुपये इतकी उत्पन्नाची वाढ यावर्षी झाली आहे. रक्षाबंधनाच्या दिवशी एसटी महामंडळाकडून काही जादा गाड्यांची सोयदेखील करण्यात आली होती. याचा प्रवाशांनी लाभ घेतला.
एसटीने प्रवास करणाऱ्या प्रवाशांची संख्या आता वाढत असून, ८ ऑगस्ट ते ११ ऑगस्ट या काळात सहा लाखांहून अधिक प्रवाशांनी प्रवास केला. त्यातून एसटीला चांगल्या प्रकारचे उत्पन्न मिळाले.
- दीपक घोडे, विभाग नियंत्रक, रायगड
फोटो - स्थानकावर प्रवाशांची गर्दी
दीपक घोडे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.