मुंबई, ता. ३ : वांद्रे-कुर्ला संकुलातील (बीकेसी) मे. वी. वर्क इंडिया मॅनेजमेंट आस्थापनावर अन्न व औषध प्रशासनाकडून कारवाई करण्यात आली. वारंवार सूचना देऊनही परवान्याशिवाय अन्न व्यवसाय करत असल्याने अन्न सुरक्षा व मानके कायदा २००६ चे कलम ५५ चे उल्लंघन केल्याप्रकरणी बीकेसी पोलिस ठाण्यात गुन्हा दाखल करण्यात आला आहे. बीकेसीतील मे. वी वर्क इंडियाच्या सी-२०, जी ब्लॉक या १६ मजली इमारतीमधील कार्यालयांवर ७ फेब्रुवारी रोजी कारवाई करण्यात आली होती. त्यावेळी अन्न पदार्थांचा व्यवसाय करण्यासाठी परवाना अथवा नोंदणी घेतली नसल्याचे आढळून आले होते. त्यानंतर १७ फेब्रुवारी, २७ फेब्रुवारी रोजीही आस्थापनात पडताळणी केली असता विनापरवाना व्यवसाय सुरू असल्याचे आढळून आले. त्यामुळे परिमंडळ ५ चे सहायक आयुक्त (अन्न) एस. एस. जाधव यांच्या मार्गदर्शनाखाली अन्न सुरक्षा अधिकारी व. रु. आडे यांनी ही कारवाई केली आहे.