मुंबई - ॲमेझॉन वेब सर्व्हिसतर्फे सन २०३० पर्यंत भारतात क्लाऊड इन्फ्रास्ट्रक्चरमध्ये १२.७ अब्ज डॉलरची गुंतवणूक केली जाईल. त्यामुळे भारताच्या जीडीपीमध्ये दोन लाख कोटी रुपयांची भर पडेल असा अंदाज आहे. भारतातील ग्राहकांची क्लाऊड सेवांची वाढती मागणी पूर्ण करण्यासाठी ही गुंतवणूक केली जाईल.

भारतातील डेटा सेंटर इन्फ्रास्ट्रक्चरमधील या नियोजित गुंतवणुकीमुळे दरवर्षी भारतीय व्यवसायांमध्ये सरासरी १,३१,७०० पूर्णवेळ नोकऱ्या निर्माण होण्यास मदत होईल. या नोकऱ्या भारतातील डेटा सेंटर पुरवठा साखळीतील उभारणी, सुविधा, देखभाल, अभियांत्रिकी, दूरसंचार आणि इतर क्षेत्रातील असतील.

यापूर्वी ॲमेझॉन वेब सर्व्हिसेसने भारतात ३०,९०० कोटी रुपयांची गुंतवणूक केली असून सन २०३० पर्यंत त्यांची भारतातील गुंतवणूक १,३६,५०० कोटी रुपयांवर (१६.४ अब्ज डॉलर) पोहचेल. ॲमेझॉन वेब सर्व्हिसेसच्या भारतातील १२.७ अब्ज डॉलर गुंतवणुकीमुळे भारताच्या डिजिटल अर्थव्यवस्थेला गती मिळेल, असे इलेक्ट्रॉनिक्स आणि माहिती तंत्रज्ञान राज्यमंत्री राजीव चंद्रशेखर म्हणाले.

ॲमेझॉन वेब सर्व्हिसच्या भारत व दक्षिण आशिया विभागाचे पुनीत चंधोक म्हणाले, की २०१६ पासून, ॲमेझॉन वेब सर्व्हिसने भारतात क्लाऊड इन्फ्रास्ट्रक्चर तयार करण्याव्यतिरिक्त आणि स्थानिक ग्राहक आणि भागीदारांना डिजिटल परिवर्तनाला मदत करण्याव्यतिरिक्त, २०१७ पासून भारतातील चाळीस लाखांहून अधिक लोकांना क्लाऊड प्रशिक्षण दिले आहे. २०३० पर्यंत १२.७ अब्ज डॉलरची आमची नियोजित गुंतवणूक भारताला जागतिक डिजिटल पॉवर हाऊस बनण्यास मदत करेल.