मनसे आपल्या दारी
निवडणुकीच्या पार्श्वभूमीवर उपक्रम; शिवडी विधानसभेतून सुरुवात

सकाळ वृत्तसेवा
मुंबई, ता. २१ : मनसे आपल्या दारी उपक्रमातून मनसे प्रत्येक विधानसभा मतदारसंघातील लोकांच्या समस्या जाणून घेणार आहे. या माध्यमातून मनसे थेट मतदारांच्या घरांपर्यंत पोहोचण्याचा प्रयत्न करणार आहे. शिवडी मतदारसंघातून शनिवारी (ता. २१) या उपक्रमाची सुरुवात करण्यात आली.

मनसे नेते बाळा नांदगावकर यांनी सांगितले, की मुंबईकरांच्या समस्या जाणून घेण्याचा प्रयत्न मनसे करीत आहे. लोकांची वाट न बघता मनसैनिक थेट लोकांमध्ये जाऊन त्यांना भेडसावणाऱ्या समस्या आणि त्यांचे प्रश्न जाणून घेणार आहे. याची सुरुवात शिवडी मतदारसंघातून केली जात आहे. लोकांसाठी हा उपक्रम असल्याने लोकांनी या उपक्रमाला प्रतिसाद द्यावा, असे आवाहनही त्यांनी केले आहे. मनसेचे शिवडी विधानसभा मतदारसंघातील शाखा अध्यक्ष नीलेश इंदप यांनी सांगितले, ‘प्रत्येक विधानसभेतील प्रभागनिहाय पथके तयार केली जातील. त्यांच्या माध्यमातून लोकांशी बोलून त्यांची मते जाणून घेतली जातील. महापालिका, म्हाडा, एसआरए, एमएमआरडीए, महावितरण इत्यादी मुंबईला सेवा पुरवणाऱ्या संस्थांबाबत लोकांच्या समस्या समजून गेऊन त्या सोडवण्याचा प्रयत्न केला जाईल.’

..
जनाधार मजबूत करण्याचा प्रयत्न
मुंबई महापालिकेची निवडणूक पुढील तीन ते चार महिन्यांत अपेक्षित आहे. त्यादृष्टीने मनसे आता सक्रिय झाली आहे. हिंदीला विरोध, मराठीचा मुद्दा यासोबतच आता थेट लोकांमध्ये जाऊन त्यांच्या अडचणी जाणून घेण्याचा प्रयत्न मनसे करीत आहे. यातून मनसे निवडणुकीच्या तयारीला लागली असून, आपला जनाधार मजबूत करण्याचा प्रयत्न करीत असल्याचे बोलले जात आहे.
...............................