अवयवदानातून तिघांना जीवदान
एकाला दृष्टी; मुंबईत विभागातील ३३वे अवयवदान
सकाळ वृत्तसेवा
मुंबई, ता. १३ : नानावटी मॅक्स रुग्णालयात सोमवारी (ता. ११) पार पडलेल्या अवयवदानामुळे तिघांना जीवदान मिळाले आहे. मुंबई विभागातील हे ३३वे अवयवदान ठरले.
नानावटी मॅक्स रुग्णालयात प्रकृती अस्वास्थ्यामुळे एका ६८ वर्षीय ज्येष्ठ महिलेला दाखल करण्यात आले होते. उपचारादरम्यान तिचा मृत्यू झाला. त्यानंतर रुग्णाच्या नातेवाइकांना तेथील डॉक्टर आणि प्रत्यारोपणाच्या समन्वयकांनी कुटुंबीयांना अवयवदानाबद्दल माहिती दिली. अवयवदानाचे महत्त्व पटवून दिल्यावर कुटुंबीयांनी अवयवदानासाठी होकार दिला. डॉक्टरांनी केलेल्या तपासणीत यकृत आणि दोन मूत्रपिंड दान करण्यात येतील, अशी माहिती विभागीय अवयवदान आणि प्रत्यारोपण समितीला दिली. त्यानंतर या समितीने मार्गदर्शक तत्त्वे आणि निकषांनुसार दान आणि प्रत्यारोपण करण्यात आले. त्याचप्रमाणे कॉर्निया दान करण्यात आला. तसेच हाडेदेखील दान करण्यात आली. त्यामुळे या अवयवदानातून तिघांना जीवदान व एकाला दृष्टी मिळाली आहे.