मुंबई-दिघी, मुंबई-काशीद रो-रो सेवा मार्चपर्यंत कार्यान्वित करा
- मंत्री नितेश राणे यांची सूचना; डिझेल परतावा योजनेपासून एकही पात्र मच्छीमार वंचित राहणार नाही
सकाळ वृत्तसेवा
मुंबई, ता. १३ : मुंबईकरांचा कोकणात जाण्याचा प्रवास सुखकर करणारी मुंबई ते दिघी आणि मुंबई ते काशीद ही रो-रो सेवा मार्च अखेरपर्यंत कार्यान्वित करावी, अशा सूचना मत्स्यव्यवसाय व बंदरे मंत्री नितेश राणे यांनी मंगळवारी (ता. १२) दिल्या. मंत्रालयात आयोजित बैठकी वेळी मंत्री राणे यांनी या सूचना दिल्या.
या बैठकीत महिला व बालविकास मंत्री आदिती तटकरे, महाराष्ट्र सागरी मंडळाचे मुख्य कार्यकारी अधिकारी पी प्रदीप यांच्यासह संबंधित अधिकारी उपस्थित होते. दिघी आणि काशीद या दोन्ही ठिकाणच्या जेट्टीच्या कामांना गती देण्याच्या सूचना देऊन मंत्री राणे म्हणाले की, मुंबईतून कोकणात जाण्यासाठी रो-रो सेवा हा एक उत्तम पर्याय असणार आहे. या सेवेमुळे वेळेची ही बचत होणार आहे. त्यामुळे या योजनेच्या कामांना गती द्यावी, जेट्टीचे काम सुरू असतानाच इतर परवानग्यांचे प्रस्ताव पाठवून मंजुरी घ्यावी. मार्च अखेरपर्यंत ही सर्व कामे पूर्ण करावीत. दरम्यान, या वेळी आमदार महेश बालदी यांच्या उपस्थितीत मच्छीमार नौकांना द्यावयाच्या डिझेल परतावा याविषयी बैठक झाली. या वेळी एकही पात्र मच्छीमार नौका डिझेल परताव्यापासून वंचित राहणार नाही, असे मंत्री राणे यांनी सांगितले. मच्छीमार संस्थांनी त्यांच्या बोटी मत्स्यव्यवसाय विभागाच्या अधिकाऱ्यांना तपासणीसाठी उपलब्ध करून द्याव्यात. याविषयी मच्छीमारांना समाधानकारक निर्णय घ्यावा, अशा सूचनाही मंत्री राणे यांनी दिल्या. अलिबाग येथील जातीचे काम दिवाळीपूर्वी पूर्ण करण्याच्या सूचनाही मंत्री राणे यांनी दिल्या.