कोट्यवधींचे अमली पदार्थ, प्रतिबंधित वन्यजीव जप्त
आंतरराष्‍ट्रीय विमानळावर कारवाई
मुंबई, ता. १३ ः बँकॉकहून भारतात होऊ घातलेली अमली पदार्थ आणि प्रतिबंधित वन्यजीवांची तस्करी कस्टम विभागाने रोखली. या कारवाईत तीन भारतीय प्रवाशांना अटक करण्यात आली. त्यांनी दडवून आणलेला सुमारे पाच किलो परदेशी गांजा (हायड्रोपोनिक वीड) आणि विविध प्रजातींचे १४ वन्य जीव कस्टम अधिकाऱ्यांनी हस्तगत केले.
हस्तगत गांजाची आंतरराष्ट्रीय बाजारपेठेत पाच कोटी रुपये किंमत असल्याचे कस्टम विभागाच्या प्रवक्त्याने स्पष्ट केले. गेल्या काही दिवसांत परदेशी गांजा आणि प्रतिबंधित वन्यजीवांची मोठ्या प्रमाणात तस्करी सुरू असून, बहुतांश कारवायांमध्ये सापडलेले कॅरिअर (अमली पदार्थ, वन्यजीव वाहून आणणारे) बँकॉक येथून येत आहेत, असे या प्रवक्त्याने स्पष्ट केले.
या पार्श्वभूमीवर कस्टम विभागाने बँकॉकहून मायदेशी परतणाऱ्या प्रवाशांच्या प्रोफाइलची काटेकोर तपासणी करून आणि नेमक्या गोपनीय माहितीच्या आधारे ११ आणि १२ जुलैच्या रात्री तीन प्रवाशांना छत्रपती शिवाजी महाराज आंतरराष्ट्रीय विमानतळावर रोखले. त्यांनी वाहून आणलेल्या सामानाची झाडाझडती घेण्यात आली. तेव्हा दोन प्रवाशांच्या ट्रॉली बॅगेत चपखलपणे बसविण्यात आलेला २.८७३ आणि २.३३९ किलो गांजा कस्टम अधिकाऱ्यांच्या हाती लागला. अन्य प्रवाशाच्या विविध प्रजातींचे एकूण १४ वन्यजीव सापडले. त्यात मुंगूस, विविध जातींचे सरडे, कासव (फोर आईड), कोळी, पालींचा समावेश आहे.