जुलैमध्ये मुंबई विभागातून ५,९८३ मेल-एक्स्प्रेस गाड्यांची धाव; तब्बल सात टक्क्यांची वाढ!
सकाळ वृत्तसेवा
मुंबई, ता. १८ : प्रवाशांची वाढती मागणी आणि गर्दीचे नियोजन लक्षात घेऊन मध्य रेल्वेच्या मुंबई विभागाने जुलै २०२५ मध्ये मेल-एक्स्प्रेस गाड्यांची संख्या लक्षणीयरीत्या वाढवली आहे. या महिन्यात एकूण ५,९८३ गाड्या धावल्या असून, गेल्या वर्षीच्या तुलनेत हा आकडा तब्बल सात टक्क्यांनी वाढलेला आहे.
यंदा जुलै महिन्यात ५,७७० नियमित मेल-एक्स्प्रेस गाड्यांसह २१३ विशेष गाड्या चालवल्या गेल्या, तर २०२४ मध्ये ५,५८५ नियमित व १५७ विशेष गाड्या धावल्या होत्या. विशेष गाड्यांच्या संख्येत तब्बल ३५ टक्के वाढ झाली आहे. गेल्या वर्षी जुलै महिन्यात रोज सरासरी १८५ गाड्या धावत होत्या. यावर्षी हा आकडा १९३ वर पोहोचला आहे. म्हणजेच प्रवाशांच्या सोयीसाठी दररोज आठ गाड्या जादा धावत आहेत. गाड्यांची संख्या वाढवतानाच त्याच्या वक्तशीरपणातही सुधारणा झाल्याचे रेल्वे प्रशासनाचे म्हणणे आहे.
एप्रिल ते जुलै २०२५ या काळात मेल-एक्स्प्रेस गाड्यांचा वक्तशीरपणा ५७ टक्क्यांवर पोहोचला आहे. गेल्या वर्षी हा आकडा ५१ टक्के होता. विशेष म्हणजे, जुलै २०२४ मध्ये मेल-एक्स्प्रेस गाड्यांचा वक्तशीरपणा केवळ ४९ टक्के होता. तो यावर्षी ५६ टक्क्यांवर गेला आहे. पावसाळ्यामुळे निर्माण होणाऱ्या अडचणी असूनही हा सकारात्मक बदल घडवता आला, असे मध्य रेल्वेने सांगितले.
---