पत्राचाळीच्या सभासदांचा वितरणपत्रास नकार

सकाळ वृत्तसेवा
मुंबई, ता. १२ : उच्च न्यायालयाच्या निर्देशानुसार म्हाडाचे अधिकारी आज गोरेगाव सिद्धार्थनगर (पात्राचाळ) सहकारी गृहनिर्माण संस्थेच्या पात्र सभासदांना घराचा ताबा देण्यासंदर्भात वितरणपत्र देण्यासाठी गेले होते; मात्र म्हाडाने अद्याप गृहनिर्माण संस्थेसोबत विकास करार केलेला नाही, प्रत्येक रहिवाशांसोबत वैयक्तिक करार केला नाही, त्यामुळे आम्ही वितरणपत्र घेणार नाही, अशी भूमिका सभासदांनी घेतली. त्यामुळे वितरणपत्र देण्यासाठी गेलेल्या म्हाडाच्या अधिकाऱ्यांची मोठी अडचण झाली.
म्हाडाच्या गोरेगाव सिद्धार्थनगर पुनर्विकास आर-९ भूखंडावरील गोरेगाव सिद्धार्थनगर सहकारी गृहनिर्माण संस्थेच्या पुनर्वसन सदनिकांचे बांधकाम पूर्ण झाले असून इमारतींना २ एप्रिल २०२५ रोजी पूर्ण भोगवटा प्रमाणपत्र प्राप्त झाले आहे. त्या पार्श्वभूमीवर म्हाडाचे अधिकारी उच्च न्यायालयाच्या निर्देशानुसार आज सकाळपासून पत्राचाळ येथे गेले होते; मात्र म्हाडाने आधी संस्थेसोबत विकसक करार करावा, रहिवाशांसोबत वैयक्तिक करार करावा, सर्व इमारतींचे स्ट्रक्चरल ऑडिट करावे, अशी मागणी करीत वितरणपत्र घेण्यास नकार दिल्याचे रहिवासी संदीप शेजवळ यांनी सांगितले. तसेच, उद्या शनिवारी (ता. १३) आम्ही सर्व सभासद रहिवाशांची तातडीची बैठक बोलावली असून त्यामध्ये पुढील निर्णय घेतला जाणार असल्याचे त्यांनी सांगितले.