पंतप्रधानांच्या वाढदिवसानिमित्त
राज्यात स्वच्छता अभियान

मुंबई, ता. १५ : पंतप्रधान नरेंद्र मोदी यांच्या अमृतमहोत्सवी वाढदिवसानिमित्त महाराष्ट्रात कौशल्य विकास विभागाच्या वतीने ‘स्वच्छता अभियान’ राबविण्यात येणार आहे.
कौशल्य विकासमंत्री मंगलप्रभात लोढा यांच्या पुढाकाराने राज्यातील ४१९ शासकीय औद्योगिक संस्थांमधून हजारो विद्यार्थी एकत्र येणार असून, तब्बल ७५० गावांत स्वच्छता अभियान राबवणार आहेत. या उपक्रमाची सुरुवात बुधवारी (ता. १७) पनवेल तालुक्यातील गव्हाण ग्रामपंचायत कार्यालयासमोर होणार आहे.

लोढा म्हणाले, ‘विकसित भारताचा संकल्प साकार करण्यातील एक महत्त्वाचा टप्पा म्हणजेच स्वच्छ भारत अभियान आहे. त्यामुळे कौशल्य विकास विभागामार्फत हा उपक्रम होत आहे. स्वच्छता, आरोग्य या विषयांबाबत आजही जागृतीची गरज आहे आणि ती गरज या अभियानाच्या माध्यमातून आम्ही पूर्ण करू.’