कृषी अभ्यासक्रमाला सर्वाधिक पसंती
यंदा ८२.५५ टक्के झाले प्रवेश
मुंबई, ता. १८ : राज्यातील पदवीच्या कृषी अभ्यासक्रमांच्या प्रवेशाला यंदा विद्यार्थ्यांनी मोठी पसंती दर्शवली असून, राज्यातील १९८ महाविद्यालयांमध्ये उपलब्ध असलेल्या १६ हजार ८२८ जागांपैकी १३ हजार ९८२ जागांवर प्रवेश पूर्ण झाले असून, एकूण टक्केवारी ८२.५५ टक्के इतकी आहे. यात सरकारी महाविद्यालयांमध्ये उपलब्ध असलेल्या तीन हजार ३१७ जागांवर ९५.३२ प्रवेश झाले असून, केवळ ४.८६ टक्के इतक्याच जागा रिक्त राहिल्या आहेत.
खासगी शिक्षण संस्थांमध्‍ये उपलब्ध १३ हजार ३४९ जागांपैकी १० हजार ५७५ जागांवर प्रवेश झाले असून, एकूण टक्केवारी ७९.२२ टक्के इतकी आहे, तर उर्वरित दोन हजार ७४ अशा एकूण २०.७८ टक्के जागा यंदाच्या शैक्षणिक वर्षांत रिक्त राहिल्या आहेत. राज्यातील एकूण शासकीय ४७ आणि खासगी १५१ कृषी महाविद्यालये असून, यात पदवीच्या बीएफ एस्सी (फिशरी सायन्स), कृषी अभियांत्रिकी, जैवतंत्रज्ञान, अन्न तंत्रज्ञान, शेती आणि कृषी उत्पादनांचे विपणन विक्री वितरण, सामुदायिक विज्ञान, फलोत्पादन आदी शाखांसाठी यंदाच्या शैक्षणिक सत्रात सीईटी सेलमार्फत प्रवेश पूर्ण झाले. यात सर्वाधिक प्रवेशाच्या जागा या बीएस्सी ॲग्रिकल्चरसाठी ११ हजार ५०० इतक्या होत्या, त्यातील १० हजार १८८ जागांवर प्रवेश झाले, तर उर्वरित हजार ३१२ जागा रिक्त राहिल्या, तर अन्न तंत्रज्ञान, जैवतंत्रज्ञान, कृषी अभियांत्रिकीच्या अर्ध्याहून अधिक जागा रिक्त राहिल्या.