सर्वसामान्यांसाठी आता ‘म्हाडा साथी’
संकेतस्थळावर ‘एआय चॅटबोट’; घरांसह सर्व प्रश्नांची एकाच ठिकाणी उत्तरे

सकाळ वृत्तसेवा
मुंबई, ता. १८ : आपल्या वेगवेगळ्या शंका, तक्रारी घेऊन म्हाडा कार्यालयात येणाऱ्या सर्वसामान्यांना आता ‘म्हाडा साथी’ची मदत मिळणार आहे. म्हाडाच्या लॉटरीतील घरांसाठी अर्ज कसा करावा, त्याची प्रक्रिया काय आहे, काेणती कागदपत्रे लागतात अशा वेगवेगळ्या प्रश्नांची उत्तरे एकाच ठिकाणी मिळावीत म्हणून म्हाडाने आज ‘म्हाडा साथी’ ही एआय चॅटबोट सुविधा सुरू केली आहे. म्हाडाचे उपाध्यक्ष व मुख्य कार्यकारी अधिकारी संजीव जयस्वाल यांच्या हस्ते म्हाडाच्या मुख्यालयात या सुविधेचे उद्‌घाटन करण्यात आले. म्हाडाच्या संकेतस्थळावर उपलब्ध करून दिलेल्या या सेवेमुळे नागरिकांच्या शंकांचे तत्काळ निराकरण होणार आहे.

म्हाडाकडून सर्वसामान्यांना परवडणाऱ्या दरात घरे उपलब्ध करून दिली जातात. माहिती व तंत्रज्ञानाचा वापर करून म्हाडाकडून नागरिकांना जास्तीत जास्त डिजिटल सेवा दिल्या जात आहेत. आता म्हाडाच्या एआय चॅटबॉट सुविधेमुळे नागरिकांचे तत्काळ शंका निरसन हाेण्यास मदत हाेणार आहे, असे संजीव जयस्वाल यांनी सांगितले. या चॅटबॉटकडून चांगली उत्तरे दिली जात आहेत; मात्र त्याचा वापर जसा वाढेल तसा तो आपल्या कामात आणखी सुधारणा करून वापरकर्त्यांना आणखी चांगली उत्तरे देईल, असा विश्वास जयस्वाल यांनी व्यक्त केला. या वेळी म्हाडाच्या मुंबई मंडळाचे मुख्य अधिकारी मिलिंद बोरीकर, मुंबई इमारत दुरुस्ती व पुनर्रचना मंडळाचे मुख्य अधिकारी मिलिंद शंभरकर, सह उपमुख्य कार्यकारी अधिकारी अनिल वानखडे आदी उपस्थित होते.

महिनाभरात म्हाडाचे मोबाईल ॲप
नागरिकांना म्हाडा कार्यालयात कमीत कमी यावे लागावे म्हणून जास्तीत जास्त ऑनलाइन सेवा दिल्या जात आहेत. ग्राहक सुविधा केंद्र त्याचाच भाग असून नागरिकांना आपला अर्ज कोणत्या स्तरावर आहे, काय कार्यवाही झाली याची माहिती सहज मिळत आहे. त्याही पुढे आता म्हाडा स्वतःचे मोबाईल ॲप तयार करत असून ताे महिनाभरात सुरू होईल, असे संजीव जयस्वाल यांनी सांगितले.

पालिका निवडणुकीनंतरच मुंबईतील घरांची लॉटरी
म्हाडाच्या कोकण मंडळाच्या लॉटरीला मोठा प्रतिसाद मिळाला आहे. अनामत रकमेसह दीड लाखांहून अधिक अर्ज आले आहेत. मुंबईतील घरांची लॉटरी दिवाळीआधी जाहीर होणार का, याकडे मुंबईकरांचे लक्ष लागले होते; मात्र म्हाडाच्या अनेक ठिकाणच्या गृह प्रकल्पांना पर्यावरण विभागाची परवानगी मिळण्यास विलंब झाला आहे. त्यामुळे पालिका निवडणुकीनंतरच फेब्रुवारी-मार्चमध्ये मुंबईतील घरांची लॉटरी येऊ शकेल, असे संजीव जयस्वाल यांनी स्पष्ट केले.
----
पुढच्या महिन्यापासून ‘ऑनलाइन अपॉइंटमेंट’
वेगवेगळ्या कामासाठी म्हाडा कार्यालयात दररोज चार-पाच हजार लोक येतात. अनेकदा अधिकारी न भेटल्याने, कामानिमित्त बाहेर गेले असतील तर भेट होत नाही, त्यांचे काम न झाल्याने पुन्हा यावे लागते. त्यामुळे म्हाडामध्ये सध्या सुरू असलेल्या व्हिजिटर मॅनेजमेंट सिस्टीमच्या माध्यमातून नागरिकांना २ ऑक्टोबरपासून आपल्याला ज्या अधिकाऱ्याला भेटायचे आहे त्यांची ऑनलाइन अपॉइंटमेंट घेता येणार असल्यामुळे गैरसोय टळणार आहे.