खातेधारकांचे १६ कोटी लंपास करणाऱ्या बँक अधिकाऱ्यास अटक

मुंबई, ता. २० : बँक ऑफ इंडियाच्या १२७ खातेधारकांचे सुमारे १६ कोटी रुपये चोरणाऱ्या हितेश कुमार सिंगला (वय ३२) यास सक्तवसुली संचालनालयाने (ईडी) बुधवारी (ता. १७) अहमदाबाद येथून अटक केली. न्यायालयाने अटक आरोपीस मंगळवार (ता. २३)पर्यंत ईडी कोठडीत ठेवण्याचे आदेश दिले.

हितेश बँकेच्या टर्नर रॉड शाखेत स्टाफ ऑफिसरपदी नियुक्त होता. २०२३ ते जुलै २०२५ या काळात त्याने वयोवृद्ध, अल्पवयीन आणि मृत खातेधारकांच्या कायम ठेवी, भविष्यनिर्वाह निधीसह अन्य, योजनांची खाती बंद केली. त्यातील रक्कम पद्धतशीरपणे स्वतःच्या खात्यावर घेतली. एका मृत खातेधारकाच्या वारसांनी खात्याबाबत चौकशी केली तेव्हा हा घोटाळा उघडकीस आला. प्राथमिक चौकशीत हितेशचे नाव पुढे आल्यानंतर त्याची अन्यत्र बदली करण्यात आली, पुढे त्याला निलंबित केले गेले. बँकेने याबाबत केंद्रीय अन्वेषण विभागाकडे (सीबीआय) तक्रार दिली होती. सीबीआयने गुन्हा नोंदवून तपास सुरू केला. त्या आधारे ईडीनेही समांतर तपास करून फरार आरोपी हितेशला अटक केली. हितेशने १४ कोटी रुपये शेअर बाजारात गुंतवल्याचे प्राथमिक तपासात स्पष्ट झाल्याचे ईडीने न्यायालयास सांगितले.