डॉ.  अनिता बोर्जेस यांचे  निधन

सकाळ वृत्तसेवा
मुंबई, ता. २० : डॉ.  अनिता बोर्जेस यांचे गुरुवारी (ता. १८) गोरखपूरमध्ये निधन झाले असून, त्या  एस. एल.  रहेजा रुग्णालयात  हिस्टोपॅथॉलॉजी विभागाच्या प्रमुख होत्या. त्यांना कॅन्सर पॅथॉलॉजीमध्ये चार दशकांहून अधिक अनुभव होता.  त्या  टाटा मेमोरियल रुग्णालयात सर्जिकल पॅथॉलॉजीच्या प्रभारी प्राध्यापक म्हणूनही निवृत्त झाल्या होत्या.   डॉ. अनिता बोर्जेस ऑन्कोपॅथोलॉजी क्षेत्रात भारतातीलच नव्हे तर जगभरातील डॉक्टरांसाठी दीपस्तंभ बनल्या होत्या. त्यांच्या पार्थिवावर शनिवारी (ता. २०) दादर येथील स्मशानभूमीमध्ये अंत्यसंस्कार करण्यात आले. डॉ. बोर्गेस या गाेरखपूर येथील कर्करोगावर उपचार करणाऱ्या डॉक्टरांना प्रशिक्षण देण्यासाठी गेल्या होत्या; मात्र प्रशिक्षणाच्या दिवशी त्यांना हृदयविकाराचा झटका आल्याने त्यांचे निधन झाले. डॉ. बोर्जेस यांचे पार्थिव गुरुवारी रात्री दिल्लीला आणि तेथून शुक्रवारी रात्री मुंबईला आणण्यात आले. दरम्यान, डॉ. अनिता बोर्जेस यांनी त्यांच्या सहकाऱ्यांना प्रेरणा दिली, तरुण डॉक्टरांना मार्गदर्शन केले आणि त्यांच्या  ज्ञानाने असंख्य मुलांना शिकवले. या कठीण काळात आमच्या प्रार्थना त्यांचे कुटुंब आणि प्रियजनांसोबत आहेत. आम्हाला त्यांच्या ज्ञानाची जीवनात नेहमीच उणीव भासेल, अशी प्रतिक्रिया एस. एल. रहेजा रुग्णालयाचे मुख्य कार्यकारी डॉ. कुणाल पुनमिया यांनी व्यक्त केली.