वडिलांसह आजोबांची हत्या
करून तरुणाची शरणागती
मुंबई, ता. २४ ः दारूच्या नशेत नियमित वाद घालणाऱ्या वडिलांसह आजोबांची गळा चिरून हत्या केल्यानंतर तरुणाने पोलिस ठाण्यात शरणागती पत्करली. ही धक्कादायक घटना मंगळवारी रात्री अंधेरी पूर्वेकडील तक्षशिला इमारतीत घडली.
आरोपी चेतन भत्रे याने वडील मनोज (वय ५०) आणि आजोबा बाबू (वय ७०) आणि काका अनिल यांच्यावर चाकूने हल्ला केला. त्यात मनोज आणि बाबू यांचा जागीच मृत्यू झाला, तर अनिल हे गंभीर जखमी झाले. त्यांच्यावर रुग्णालयात उपचार सुरू आहेत. चेतन हा परिसरातील एका मेडिकल स्टोअरमध्ये नोकरी करून कुटुंबाचा उदरनिर्वाह चालवित होता; मात्र त्याचे वडील आणि आजोबांना दारूचे व्यसन होते. ते रोज दारू पिऊन वाद घालत. त्यास चेतन कंटाळला होता. मंगळवारी रात्रीही तेच घडले. चेतनने नशेत असलेल्या वडील, आजोबांचा एकामागोमाग गळा चिरला. प्रत्यक्षदर्शी अनिलने मध्यस्थी करण्याचा प्रयत्न केला असता, त्यांच्यावरही चेतनने चाकूने वार केले. त्यानंतर चेतन परिसरातील नवरात्रोत्सव मंडळाजवळ बंदोबस्तासाठी तैनात पोलिसांकडे शरण आला. त्या वेळी त्याच्या हाती रक्ताने माखलेला चाकू होता. त्यानंतर त्यास अटक करण्यात आल्याची माहिती पोलिस उपायुक्त दत्ता नलावडे यांनी दिली.