अभिनेत्याच्या कॅफेतील
गल्ल्यावर डल्ला

व्‍यवस्थापकाची ३५ लाखांची अफरातफर

मुंबई, ता. २६ ः अभिनेता जिब्रान खान याने वांद्र्यात सुरू केलेल्या कॅफेच्या गल्ल्यावर व्यवस्थापकाने ३५ लाखांचा डल्ला मारला. या रकमेत आणखी वाढ होऊ शकते, असा अंदाज जिब्रानने वांद्रे पोलिसांकडे केलेल्या तक्रारीत नमूद केले आहे.

जिब्रानच्या तक्रारीवरून वांद्रे पोलिस ठाण्यात आरोपी व्यवस्थापक अजय रावतविरोधात दोन दिवसांपूर्वी फसवणुकीचा गुन्हा दाखल करण्यात आला आहे. तक्रारीनुसार जिब्रानने तीन वर्षांपूर्वी माउंट मेरी परिसरात ग्राउंडेड नावाचे कॅफे शॉप सुरू केले. त्याची जबाबदारी रावत याच्यावर हाेती. वस्तू, जिन्नस पुरवठादारांसह कॅफेतील एका कर्मचाऱ्याला संशय आल्यानंतर जिब्रानने गेल्या आर्थिक वर्षातील ऑडिट करून घेतले. त्यात एक कोटी १४ लाख रुपयांचा व्यवसाय झाला; मात्र रावतने ७९ लाख भरले. उर्वरित ३५ लाख रुपयांचा हिशेब मागितला असता त्याने उडवाउडवीची उत्तरे दिली. त्यानंतर त्याने जिब्रानचे फोन उचलणेच बंद केले. ३१ मार्च ते सप्टेंबरपर्यंत रावत याने आणखी काही रकमेत अफरातफर केल्याचा संशय जिब्रानला आहे, असे वांद्रे पोलिस ठाण्यातून सांगण्यात आले.