६५ वर्षीय महिलेची रजोनिवृत्तीनंतरच्या रक्तस्त्रावातून सुटका

मुंबई, ता. २ : एका ६५ वर्षीय महिलेवर नुकत्याच झालेल्या एका गुंतागुंतीच्या शस्त्रक्रियेनंतर गेल्या १५ वर्षांपासूनच्या आरोग्याच्या समस्येतून दिलासा मिळाला आहे. बृहन्मुंबई महापालिका संचालित, कांदिवलीस्थित भारतरत्न डॉ. बाबासाहेब आंबेडकर महापालिका सर्वसाधारण रुग्णालय येथील डॉक्टरांच्या चमुने या महिलेवर एक अतिशय गुंतागुंतीची शस्त्रक्रिया करण्यात यश मिळवले. रजोनिवृत्तीनंतरच्या रक्तस्त्रावाच्या समस्येमुळे ही महिला त्रस्त होती. या समस्येवर सोनोग्राफी आणि एमआरआय आदी चाचण्या करून उपचारासाठी शस्त्रक्रिया करण्याचा निर्णय डॉक्टरांनी घेतला. मधुमेह आणि उच्च रक्तदाब विकार असणाऱ्या या रुग्णावर गुंतागुंतीची शस्त्रक्रिया करणे हे वैद्यकीयदृष्ट्या अतिशय आव्हानात्मक होते. हे आव्हान डॉक्टरांनी यशस्वीपणे पेलले. शस्त्रक्रिया करताना घेण्यात आलेल्या दक्षतेमुळे रक्तस्त्राव कमी झाला. शस्त्रक्रियेसाठी येणारा खर्च अधिक होता, मात्र रुग्ण आर्थिकदृष्ट्या दुर्बल घटकातील होता. त्यामुळे शासकीय योजनेचा लाभ मिळवून देत रुग्णावर मोफत शस्त्रक्रिया करण्यात आली. शस्त्रक्रियेनंतर रुग्णाची प्रकृती स्थिर असल्याचे रुग्णालय प्रशासनामार्फत सांगण्यात आले.