रस्‍ते सुरक्षा ऑडिटर्स प्रशिक्षणाला प्रारंभ
सकाळ वृत्तसेवा
मुंबई, ता. ३० : भारतातील रस्ते व महामार्गांवरील सुरक्षेसंदर्भात इंटरनॅशनल रोड फेडरेशन या जिनिव्हा स्थित संघटनेच्या रस्‍ते सुरक्षा ऑडिटर्स प्रशिक्षणाला महाराष्ट्र राज्य रस्ते विकास महामंडळाच्या वांद्रे कार्यालयात सोमवारपासून (ता. २७) सुरुवात झाली.
सहव्यवस्थापकीय संचालक राजेश पाटील यांच्या उपस्थितीत प्रशिक्षण सत्राला सुरुवात झाली असून, ७ नोव्हेंबरपर्यंत ते चालणार आहे. यामध्ये रस्ते सुरक्षेबद्दल आंतरराष्ट्रीय स्तरावरील प्रमाणपत्र प्रदान करण्यात येणार आहे.
भारतातील विविध राज्यांमधून व संस्थांमधून २७ प्रशिक्षणार्थी या प्रशिक्षणासाठी आले असून, एमएसआरडीसीचे अधिकारी, अभियंते यांचाही समावेश आहे. रस्ते व महामार्गाच्या सुरक्षा ऑडिटसंदर्भात प्रशिक्षणासाठी यूके स्थित आंतरराष्ट्रीय तज्ज्ञ ईर. ईग म्युगिल अँगल सेरोनो संटोस मार्गदर्शन करीत आहेत. या वेळी मुख्य अभियंता (नोडल) एस. के. सुरवसे, विशेष कार्यकारी अधिकारी व कार्यकारी अभियंता हेमंत जगताप, इंटरनॅशनल रोड फेडरेशनेचे अध्यक्ष के. के. कपिला, वरिष्ठ पदाधिकारी डी. ओ. तावडे उपस्थित होते.
एमएसआरडीसीचे उपाध्यक्ष व व्यवस्थापकीय संचालक अनिलकुमार गायकवाड हे या इंटरनॅशनल रोड फेडरेशनेचे उपाध्यक्ष असून, त्यांच्या प्रयत्नाने आंतरराष्ट्रीय दर्जाचे प्रशिक्षण भारतीय अभियंत्यांना मुंबई येथे उपलब्ध करून देण्यात आले आहे.