आमदारांच्या कार्यालयासमोर समूहगान करू
‘वंदे मातरम्’ला विरोध; लोढा यांची आमदारांवर टीका
मुंबई, ता. ४ ः काँग्रेस आणि समाजवादी पार्टीचे आमदार अस्लम शेख, अमीन पटेल आणि अबू आझमी यांच्या कार्यालयासमोर स्वातंत्र्यलढ्यातील स्फूर्तीगीत ‘वंदे मातरम्’चे सामूहिक गायन करणार असल्याची घोषणा कौशल्य विकासमंत्री मंगलप्रभात लोढा यांनी केली आहे.
‘वंदे मातरम्’ गीताला येत्या ७ नोव्हेंबरला १५० वर्षे पूर्ण होत असून या अनुषंगाने ‘सार्ध शताब्दी महोत्सव’अंतर्गत शैक्षणिक संस्थांमध्ये ‘वंदे मातरम्’चे समूह गायन होणार आहे. मंत्री लोढा यांनी शारदा मंदिर या गावदेवी येथील शाळेत सोमवारी विद्यार्थ्यांसह समूह गायन करून कार्यक्रमाला उत्साहात सुरुवात केली. या वेळी ते प्रसारमाध्यमांशी बोलत होते.
समाजवादी पार्टीचे आमदार अबू आझमी यांनी मातृभूमीला वंदन करणाऱ्या ‘वंदे मातरम्’ गीताला विरोध केल्याबाबत लोढा यांनी संताप व्यक्त केला. हे गीत कोणत्याही जाती-धर्माच्या विरोधात नाही. या गीताने केवळ राष्ट्रप्रेमाची प्रेरणा मिळते, या गीताला विरोध करून आझमींसारखे नेते राष्ट्रद्रोह करत असल्याचे लोढा यांनी या वेळी सांगितले. राष्ट्रभक्तीच्या भावनेने आम्ही वंदे मातरम् म्हणणारच, तसेच या गीताचा विरोध करणाऱ्यांच्या कार्यालयासमोरही ‘वंदे मातरम्’चे सामूहिक गायन करू, असे आव्हानही मंत्री लोढा यांनी काँग्रेस आणि समाजवादी पक्षाच्या आमदारांना दिले.