कुर्ल्यात गॅस गळतीमुळे आग
मुंबई : कुर्ला (पश्चिम) येथील विनोबा भावे नगरातील चारमजली मुबारक इमारतीमध्ये बुधवारी (ता. १९) दुपारी दीड वाजण्याच्या सुमारास गॅस पाइपलाइनमध्ये झालेल्या गळतीमुळे आग लागल्याची घटना घडली. या घटनेची माहिती मिळताच अग्निशमन दलाने घटनास्थळी धाव घेत आगीवर नियंत्रण मिळवण्याचे प्रयत्न सुरू केले. ही आग ‘लेव्हल-१’ म्हणून घोषित करण्यात आली. अग्निशमन दलाने केलेल्या प्राथमिक तपासानुसार, ‘एमजीएल’च्या गॅस पाइपलाइनमध्ये झालेल्या गळतीमुळे ही आग लागली. आगीवर वेळीच नियंत्रण मिळवल्यामुळे आग इमारतीच्या इतर मजल्यांपर्यंत पोहोचू शकली नाही. या घटनेत कोणीही जखमी किंवा जीवितहानी झाल्याची नोंद नाही, असे महापालिका प्रशासनाने सांगितले.