उद्योजक रवींद्र माणगावे भाजपमध्ये
मुंबई, ता. १९ : ज्येष्ठ उद्योजक आणि महाराष्ट्र चेंबर ऑफ कॉमर्स इंडस्ट्री अँड ॲग्रीकल्चरचे अध्यक्ष रवींद्र माणगावे यांनी बुधवारी (ता. १९) भाजपमध्ये प्रवेश केला. प्रदेशाध्यक्ष रवींद्र चव्हाण, केंद्रीय मंत्री मुरलीधर मोहोळ आणि मंत्री चंद्रकांत पाटील तसेच ज्येष्ठ उद्योगपती संतोष मंडलेचा यांच्या प्रमुख उपस्थितीत हा प्रवेश झाला. मुख्यमंत्री देवेंद्र फडणवीस यांच्या दूरदर्शी नेतृत्वाखाली राज्यात ‘उद्योगविकास’, ‘ग्रामविकास’ आणि ‘तरुण उद्योजकता’ या तीनही क्षेत्रांना मिळालेल्या नवसंजीवनीमुळे आपण प्रेरित झालो, असे रवींद्र माणगावे म्हणाले. ‘गाव तिथे उद्योजक’ हा आपला मुख्य ध्यास असून गावागावात उद्योगनिर्मिती घडवून ग्रामीण अर्थव्यवस्थेला नवी दिशा देण्याला राजकीय व्यासपीठावरून वेग मिळावा, अशीही भावना त्यांनी व्यक्त केली. मुख्यमंत्र्यांच्या नेतृत्वाखाली हे स्वप्न अधिक भक्कम करण्याचा संकल्प त्यांनी यावेळी व्यक्त केला. वयाच्या केवळ २१ व्या वर्षी ते सरपंच म्हणून निवडून आले होते.