मुंबईत शिक्षक पात्रता परीक्षा सुरळीत

केंद्रांवर बायाेमेट्रिक हजेरी; एक हजार १४६ उमेदवारांची दांडी

सकाळ वृत्तसेवा
मुंबई, ता. २३ : भावी शिक्षकांना शिक्षक होण्यासाठी अत्यावश्यक असलेली शिक्षक पात्रता परीक्षा (टीईटी) रविवारी मुंबई आणि परिसरात काही अपवाद वगळता सुरळीत पार पडली. मुंबई आणि परिसरात या परीक्षेला नोंदणी केलेल्या १२ हजार ५८१ उमेदवारांपैकी ११ हजार ४४२ उमेदवारांनी ही परीक्षा दिली. उर्वरित एक हजार १४६ उमेदवारांनी या परीक्षेला दांडी मारल्याचे दिसून आले.

राज्य परीक्षा परिषदेसह शालेय शिक्षण विभागातील अधिकारी, कर्मचाऱ्यांना ही परीक्षा सुरळीत होण्यासाठी यापूर्वीच प्रशिक्षण देण्यात आल्याने कुठेही अनुचित प्रकार घडला नाही. परीक्षेला येणाऱ्या प्रत्येक उमेदवाराची बायोमेट्रिक हजेरी घेण्यात आली. यामुळे परीक्षा केंद्रांवर कोणतीही साधने नेण्यास प्रतिबंध केल्यामुळे कोणतीही अनुचित घटना घडली नसल्याची माहिती परीक्षा परिषदेने दिली.

टीईटीची ही परीक्षा मुंबई शिक्षण उपसंचालक कार्यालयांअंतर्गत येणाऱ्या तीन विभागांतील १८ परीक्षा केंद्रांवर सकाळी आणि दुपारच्या सत्रात दोन पेपरसाठी घेण्यात आली. मुंबई आणि परिसरात टीईटीची परीक्षा सुरळीत व्हावी, यासाठी राज्य परीक्षा परिषदेने अत्यंत चोख व्यवस्था केली होती. परीक्षेशी संबंधित कर्मचाऱ्यांना अनेक प्रकारचे प्रशिक्षण दिले होते. परीक्षेच्या दिवशी उमेदवारांना एक तास अगोदर उपस्थित राहण्याचे बंधनकारक करण्यात आले होते. यासोबत परीक्षा परिषदेच्या आणि जिल्हाधिकाऱ्यांच्या सूचनांनुसार सर्व परीक्षा केंद्रांवर भरारी पथकांद्वारे सातत्याने परीक्षा केंद्रावर लक्ष ठेवण्यात आले होते.