जेजे उड्डाणपुलाखालील सुशोभीकरण महिला बचतगटांकडे
सकाळ वृत्तसेवा
मुंबई, ता. १ : महानगरपालिकेच्या ''बी'' विभागाने मकदूमशाह–माहिमी (जे जे फ्लायओव्हर) उड्डाणपुलाखालील जागेचे सुशोभीकरण व विकास करण्याचा महत्त्वाकांक्षी उपक्रम हाती घेतला आहे. या माध्यमातून महिलांना रोजगार आणि स्वावलंबनाची नवी संधी उपलब्ध होणार आहे.
प्रकल्पाअंतर्गत विनावापरातील तीन बेस्ट बसेसचे रूपांतर उपहारगृह, वाचनालय आणि कलादालन यात केले जाणार आहे. या तिन्ही घटकांचे व्यवस्थापन करण्यासाठी महिला बचत गट आणि संघांकडून अर्ज मागविण्यात आले आहेत. एका गटास एकाच घटकासाठी अर्ज करता येणार आहे. अर्ज स्वीकारण्याची अंतिम मुदत २ डिसेंबर आहे. अर्ज विनामूल्य असून, बी विभाग कार्यालयात जमा करता येणार आहेत. हा प्रकल्प स्थानिक महिलांना उपजीविका आणि सामाजिक सहभागाची संधी देणारा असून, संपूर्ण प्रक्रिया पारदर्शक असेल, असे पालिकेने स्पष्ट केले आहे.