हवा मोजमाप स्थानकांचे सर्वेक्षण करणार

एमपीसीबीचे अध्यक्ष सिद्धेश कदम यांची माहिती

सकाळ वृत्तसेवा
​मुंबई, ता. ११ ः मुंबई आणि महामुंबई परिसरातील वायू प्रदूषणावर नियंत्रण मिळवण्यासाठी महाराष्ट्र प्रदूषण नियंत्रण मंडळ निर्णायक पाऊल उचलणार आहे. वायू प्रदूषणासाठी कारणीभूत ठरणाऱ्या मूळ घटकांचा शोध घेणे आवश्यक आहे. त्यानंतरच या समस्येवर नियंत्रण मिळू शकेल, असे मत महाराष्‍ट्र प्रदूषण नियंत्रण मंडळाचे (एमपीसीबी) अध्यक्ष सिद्धेश कदम यांनी व्‍यक्त केले. सर्व हवा गुणवत्ता स्थानकांची अचूकता तपासण्यासाठी एमपीसीबी लवकरच सर्वेक्षण करणार असल्याचेही त्यांनी स्पष्ट केले.

कदम यांनी आज मालाड-मालवणी येथील एपीजे अब्दुल कलाम उद्यानातील हवा गुणवत्ता मोजमापन केंद्राला भेट दिली. या वेळी त्यांनी केंद्रातील मापनाच्या तांत्रिक घटकांची योग्य पडताळणी होते की नाही, याची तपासणी केली. मुंबई शहरात कार्यरत असलेल्या आयआयटीएम, महापालिका आणि एमपीसीबीच्या सर्व हवा गुणवत्ता स्थानकांची तांत्रिक अचूकता तपासण्यासाठी एमपीसीबी लवकरच सर्वेक्षण करणार असल्याचे त्यांनी स्पष्ट केले.

ज्या ठिकाणी हवेच्या गुणवत्तेचा निर्देशांक मध्यम किंवा धोकादायक पातळीवर जात असेल, त्या परिसरात प्रदूषणात वाढ होण्यासाठी कोणते घटक कारणीभूत आहेत, याबद्दल तातडीने सर्वेक्षण करणे आवश्यक असल्याचे मत कदम यांनी व्यक्त केले. त्यांनी बोरिवली नॅशनल पार्क येथील केंद्रालाही भेट देऊन हवा सुधारण्यासाठी आवश्यक निर्देश दिले.

हवेसह जलप्रदूषण नियंत्रणाच्या दिशेने पावले टाकताना कदम यांनी ठाणे शहरातील कोपरी येथील मलनिस्सारण केंद्राला (एसटीपी) भेट दिली. या केंद्रातून शुद्धीकरण केलेले पाणीविहित मर्यादेत आहे. त्यात मासे सोडण्यात आले असून याबाबत महापालिकेचे त्यांनी कौतुक केले. ​या शुद्धीकरण केलेल्या पाण्याचा पुनर्वापर करण्यासाठी ‘सर्क्युलर इकॉनॉमी’च्या माध्यमातून पावले उचलावीत, तसेच या केंद्राची क्षमता १२० एमएलडीपर्यंत वाढवावी, असे निर्देश त्यांनी या वेळी दिले.
-------------------
महापालिका, एमपीसीबीची देखरेख
कदम यांनी उपवन येथील हवा गुणवत्ता केंद्रालाही भेट देऊन प्रदूषणास कारणीभूत घटकांना नियंत्रित करण्याचे आवाहन अधिकाऱ्यांना केले. मुंबई आणि एमएमआर परिसरातील हवा प्रदूषण नियंत्रणासाठी संबंधित महापालिका आणि एमपीसीबी सातत्याने देखरेख ठेवणार असून, त्यावर तत्काळ उपाययोजना केल्या जाणार असल्याचे आश्वासन त्यांनी दिले.
...........