सरळगाव : नागरिकांनी ३१ डिसेंबरपर्यंत मालमत्ता कर व पाणीपट्टीचा भरणा न केल्यास थकबाकीवर प्रतिमाह दोन टक्के जादा आकारणी करण्यात येणार असल्याचा इशारा मुरबाड नगरपंचायतीने दिला आहे. नगरपंचायतीकडे मोठ्या प्रमाणात मालमत्ता कर व पाणीपट्टीची थकबाकी जमा होत असल्याने हे आवाहन केल्याचे नगरपंचायतीच्या वतीने स्पष्ट करण्यात आले आहे. अनेक नागरिक वेळेवर कराचा भरणा करत नसल्यामुळे नगरपंचायतीच्या आर्थिक नियोजनावर परिणाम होत आहे. त्यामुळे करवसुलीसाठी कठोर भूमिका घेण्यात येत आहे. यासाठी १ जानेवारीपासून थकित रकमेवर प्रतिमाह दोन टक्के जादा आकारणी लागू केली जाणार आहे. नागरिकांनी कोणताही अतिरिक्त आर्थिक भार टाळण्यासाठी वेळेत कराचा भरणा करावा; तसेच नगरपंचायतीच्या विकासकामांना सहकार्य करावे, असे आवाहन नगरपंचायतीकडून करण्यात आले आहे.