आयटीआयमध्ये पूजाविधी व पौराहित्याचे धडे
कुंभमेळ्याच्या पार्श्वभूमीवर नाशिकमध्ये अभ्यासक्रम
मुंबई, ता. १५ ः नाशिक येथील आगामी सिंहस्थ कुंभमेळ्याच्या पार्श्वभूमीवर राज्यातील आयटीआयच्या विद्यार्थ्यांना पूजाविधी आणि पौरोहित्याचे प्रशिक्षण देणारे अल्पकालीन अभ्यासक्रम नाशिक येथे सुरू होत आहेत. व्यवसाय शिक्षण व प्रशिक्षण संचालनालयांतर्गत राज्यातील शासकीय आयटीआयमध्ये अशा प्रकारचा धार्मिक स्तरावरील अभ्यासक्रम शिकवला जाणार असल्याने याबाबत उलटसुलट चर्चा सुरू झाल्या आहेत.
आयटीआयतील ही २१ दिवसांची कार्यशाळा १६ डिसेंबर रोजी श्री स्वामी अखंडानंद वेद वेदांग संस्कृत महाविद्यालय, नाशिक येथे सुरू होणार आहे. कुंभमेळ्यादरम्यान मोठ्या प्रमाणावर आवश्यक असणाऱ्या पूजाविधी, पौरोहित्य सेवा आणि धार्मिक विधींसाठी प्रशिक्षित मनुष्यबळ तयार करणे, हा कार्यशाळेचा मुख्य उद्देश आहे. कार्यशाळेत कुंभमेळ्याचे शास्त्रीय आणि वैज्ञानिक महत्त्व, सिंहस्थ पूजन विधी, तीर्थक्षेत्रातील तप-जप व स्नान विधी, शांतीसूक्त पाठ, प्रायश्चित्त संकल्प, सकाम व निष्काम संकल्प, वेदोक्त व पुराणोक्त पूजन पद्धती, गोदावरी पूजन, दशविधी स्नान, विष्णूपूजन, गौदान आणि तर्पण विधींचा समावेश करण्यात आल्याचे कौशल्य, रोजगार, उद्योजकता आणि नावीन्यता विभागाने सांगितले आहे.
----
एक महिन्याचा प्रमाणपत्र अभ्यासक्रम
याशिवाय कौशल्य विकास विभाग आणि कविकुलगुरू कालिदास संस्कृत विश्वविद्यालय, रामटेक यांच्या संयुक्त विद्यमाने एक महिन्याचा प्रमाणपत्र अभ्यासक्रमदेखील राबविण्यात येणार आहे. त्यात एकूण ४५ तासांचे प्रशिक्षण दिले जाणार असून, चार टप्प्यांतील अभ्यासक्रमास प्रत्येकी २५ गुण असणार आहेत. परीक्षेतील गुण आणि उपस्थितीच्या आधारे यशस्वी उमेदवारांना प्रमाणपत्र देण्यात येणार आहे.
----
भारतीय संस्कृतीला विज्ञानाची जोड आहे. या कार्यशाळेच्या माध्यमातून वेदपुराणातील परंपरांचे ज्ञान प्राप्त होईल आणि त्यातून रोजगाराचे नवे पर्यायही उपलब्ध होतील.
- मंगलप्रभात लोढा, कौशल्य विकास मंत्री