उच्च न्यायालयासमोर
आत्मदहनाचा प्रयत्न
जमिनीचा मोबदला न मिळाल्याने टोकाचा निर्णय
सकाळ वृत्तसेवा
मुंबई, ता. १५ ः विरार येथील प्रकाश सावंत (वय ४५) नामक व्यक्तीने शासकीय प्रकल्पात गेलेल्या जमिनीचा मोबदला आणि वकिलाने केलेल्या फसवणुकीला कंटाळून सोमवारी (ता. १५) दुपारी उच्च न्यायालयासमोर आत्मदहनाचा प्रयत्न केला. या घटनेत सावंत सुमारे ६० टक्के भाजले असून, त्यांना जीटी रुग्णालयात दाखल करण्यात आले.
प्राथमिक माहितीनुसार, सावंत मूळचे कणकवली तालुक्यातील नरडवे गावचे रहिवासी आहेत. त्यांच्या जमिनीचा काही भाग मध्यम पाटबंधारे प्रकल्पासाठी शासनाने अधिग्रहित केला. त्याच्या मोबदल्यासाठी ते गेल्या काही वर्षांपासून पाठपुरावा करत होते. त्यासाठी त्यांनी न्यायालयीन लढाईची तयारीही केली होती; मात्र एका वकील महिलेने ६.८० लाख रुपये घेऊन त्यांची फसवणूक केली. त्याविरोधात तक्रार केल्यानंतर वकील महिलेने सहा लाख परत केले; मात्र उर्वरित रक्कम परत न केल्याने निराशेच्या गर्तेत सावंत यांनी टोकाचे पाऊल उचलल्याचा अंदाज पोलिसांनी वर्तवला.

या प्रकरणाची चौकशी, तपास आझाद मैदान पोलिसांकडून केला जात आहे.