मुंबई महापालिकेत ‘निवडणूक सन्नाटा’

गर्दी ओसरली, खुर्च्या रिकाम्या; कंत्राटदारांनी फिरवली पाठ

​सकाळ वृत्तसेवा
मुंबई, ता. १७ : मुंबई महापालिका निवडणुकीची आचारसंहिता लागू होताच सतत गजबजलेल्या महापालिका मुख्यालयात आता शांतता पसरली आहे. नवीन कामांच्या निविदा काढण्यावर निर्बंध आल्यामुळे आणि बहुतांश अधिकारी निवडणूक कामांत व्यस्त झाल्याने महापालिकेचे कामकाज एका वेगळ्या वळणावर आले आहे. नव्या घोषणांना ब्रेक लागला असून, केवळ सुरू असलेले प्रकल्प पुढे रेटण्यावर प्रशासनाचा भर आहे.

​नेहमी राजकीय नेते, त्यांचे समर्थक आणि विविध कामांसाठी येणाऱ्या सर्वसामान्यांच्या गर्दीने फुलून जाणारे महापालिका मुख्यालय रिकामे वाटू लागले आहे. आचारसंहितेमुळे लोकप्रतिनिधींची कार्यालये बंद झाली आहेत. यापूर्वी फाइल आणि निविदांच्या कामासाठी मुख्यालयात ठाण मांडून बसणारे कंत्राटदार आता फिरकेनासे झाले आहेत. नवीन निविदा प्रक्रिया पूर्णपणे थांबल्याने कंत्राटदारांमध्येही निरुत्साह दिसून येत आहे.

​अधिकारी निवडणुकीच्या रिंगणात
महापालिकेच्या विविध विभागांतील वरिष्ठ आणि कनिष्ठ दर्जाचे अधिकारी सध्या निवडणूक ड्युटीमध्ये व्यग्र आहेत. मतदानाची तयारी, केंद्रवाटप आणि क्षेत्रीय स्तरावरील इतर कामांमुळे अधिकारी कार्यालयात उपलब्ध नसतात. जे अधिकारी कार्यालयात आहेत, तेही आचारसंहितेच्या कडक नियमांमुळे माध्यम प्रतिनिधी किंवा अभ्यागतांशी कोणत्याही धोरणात्मक निर्णयावर चर्चा करण्यास टाळाटाळ करीत आहेत. ‘मीडिया परमिशन’ किंवा नवीन प्रकल्पांच्या मंजुरीबाबत अधिकारी गुप्तता पाळत असल्याचे चित्र आहे.

​केवळ जुनीच कामे मार्गी लागणार
आचारसंहितेच्या काळात नवीन विकासकामांना मंजुरी देता येत नाही. त्यामुळे ज्या कामांचे आदेश (वर्क ऑर्डर) आचारसंहिता लागण्यापूर्वी देण्यात आले होते, तीच कामे सध्या सुरू आहेत. रस्ते सुधारणा, पुलांची डागडुजी आदी कामे आणि यांसारखे सुरू असलेले प्रकल्प कोणत्याही अडथळ्याविना पुढे नेण्याचा प्रयत्न प्रशासन करत आहे.